കോട്ടയം:സംസ്ഥാനത്ത് മൽസ്യവിപണി കൂടുതൽ സജീവമാക്കുന്നതിനായി ‘ഫ്രഷ് ഫിഷ്’ സൂപ്പർ മാർക്കറ്റുകൾ ആരംഭിക്കാനൊരുങ്ങി മത്സ്യഫെഡ്.പദ്ധതിയുടെ ആദ്യഘട്ടം കോട്ടയത്താണ് ആരംഭിക്കുക.പിന്നീട് മൂന്നു വർഷത്തിനുള്ളിൽ സംസ്ഥാനത്ത് പത്തു സൂപ്പർമാർക്കറ്റുകൾ കൂടി ആരംഭിക്കാനാണ് പദ്ധതി. അത്യാധുനിക സൗകര്യങ്ങളോടെ 2000 മുതൽ 3000 ചതുരശ്ര അടി വിസ്തീർണ്ണത്തിൽ ഒരുക്കുന്ന സൂപ്പർമാർക്കറ്റുകളിൽ എല്ലാത്തരത്തിലുമുള്ള പച്ചമൽസ്യങ്ങൾ, ഫ്രോസൺ ഫിഷ്,ഉണക്കമീൻ,മീൻ അച്ചാർ,ചമ്മന്തിപ്പൊടി പോലുള്ള മൂല്യവർധിത ഉൽപ്പന്നങ്ങളും ലഭ്യമാക്കും.ഉപഭോക്താവ് തിരഞ്ഞെടുക്കുന്ന മൽസ്യങ്ങൾ മസാല പുരട്ടി കറിവെയ്ക്കാൻ പാകത്തിന് തയ്യാറാക്കി നൽകും.കൂടാതെ ‘ചട്ടിയിലെ മീൻകറി’ പോലെ ജനങ്ങളെ ആകർഷിക്കുന്ന തരത്തിലുള്ള വിഭവങ്ങളും ഇവിടെ ഒരുക്കും.പരമ്പരാഗത മൽസ്യത്തൊഴിലാളികളിൽ നിന്നും മത്സ്യത്തൊഴിലാളി സഹകരണ സംഘം വഴി മത്സ്യഫെഡ് ശേഖരിക്കുന്ന മൽസ്യങ്ങളാകും ഫ്രഷ് ഫിഷ് സൂപ്പർ മാർക്കറ്റുകളിലൂടെ വിപണിയിലെത്തിക്കുക.മൽസ്യഫെഡിന്റെ നേതൃത്വത്തിൽ തിരുവനന്തപുരത്ത് ആരംഭിച്ച ‘ഫിഷർട്ടേറിയൻ മൊബൈൽ മാർട്ട്’ വിജയമായതോടെ കൊല്ലം,കോട്ടയം,കോഴിക്കോട് തുടങ്ങിയ ജില്ലകളിൽ കൂടി പുതിയ മൊബൈൽ മാർട്ടുകൾ ആരംഭിക്കാനും തീരുമാനിച്ചു. പരമ്ബരാഗത മൽസ്യത്തൊഴിലാളികളിൽ നിന്നും ഉച്ചയ്ക്ക് പന്ത്രണ്ടുമണിയോടെ ശേഖരിക്കുന്ന മൽസ്യം നാല് മണിക്കൂറിനുള്ളതിൽ ഉപഭോക്താക്കളിലേക്ക് എത്തിക്കുന്നതാണ് ഈ പദ്ധതിയുടെ പ്രത്യേകത.കോഫി ഹൌസ് മാതൃകയിൽ പാതയോരങ്ങളിൽ ‘സീ ഫുഡ് കിച്ചൻ’ ആരംഭിക്കാനുള്ള പദ്ധതിയും മൽസ്യഫെഡിന്റെ പരിഗണനയിലാണ്.