പത്തനംതിട്ട:ശബരിമല ദർശനത്തിനെത്തിയ കണ്ണൂർ സ്വദേശികളായ യുവതികളെ പോലീസ് വീണ്ടും തിരിച്ചയച്ചു.രേഷ്മ നിഷാന്ത്,ശനില എന്നിവരെയാണ് പോലീസ് നിലയ്ക്കലിൽ നിന്നും എരുമേലിയിലേക്ക് മടക്കി അയച്ചത്.ശബരിമല ദർശനത്തിനായി നിലയ്ക്കലിലെത്തിയ ഇവരെ പോലീസ് തടഞ്ഞ് കൺട്രോൾ റൂമിലേക്ക് മാറ്റി.മലകയറാൻ ശ്രമിച്ച വൻ പ്രതിഷേധമുണ്ടാകുമെന്നും പോലീസ് സംരക്ഷണം നല്കാൻ ആവില്ലെന്നും പോലീസ് ഇവരെ അറിയിച്ചു.ഇതിനു ശേഷമാണ് ഇരുവരെയും മടക്കിയയച്ചത്.കഴിഞ്ഞ ബുധനാഴ്ച ദർശനത്തിനെത്തിയ ഇവരെ നീലിമലയിൽ പ്രതിഷേധക്കാർ തടഞ്ഞിരുന്നു.എന്നാൽ തങ്ങൾ വ്രതമെടുത്താണ് എത്തിയിരിക്കുന്നതെന്നും മടങ്ങിപ്പോകാൻ തയ്യാറല്ലെന്നും ഇവർ പറഞ്ഞു.എന്നാൽ മലകയറാൻ അനുവദിക്കില്ലെന്ന് പ്രതിഷേധക്കാരും നിലപാടെടുത്തു.തുടർന്ന് പോലീസ് ഇടപെട്ട് ഇവരെ അന്നും മടക്കിയയക്കുകയായിരുന്നു.