തിരുവനന്തപുരം:സംസ്ഥാനത്ത് വൈദ്യുതി നിരക്ക് കൂട്ടാൻ റെഗുലേറ്ററി കമ്മിഷനില്‍ ധാരണ.നിരക്ക് കൂട്ടാന്‍ സര്‍ക്കാരും തീരുമാനിച്ചു.വര്‍ധന ഈ മാസം 18ന് പ്രഖ്യാപിക്കും.എത്ര ശതമാനം വര്‍ധന വരുത്തണമെന്ന കാര്യത്തില്‍ കമ്മിഷനില്‍ ചര്‍ച്ച തുടരുകയാണ്.എന്നാല്‍, വൈദ്യുതി ബോര്‍ഡ് ആവശ്യപ്പെട്ടയത്രയും വര്‍ധന അനുവദിക്കാനിടയില്ലെന്നാണ് റിപ്പോര്‍ട്ട്.വരുന്ന നാലുവര്‍ഷം രണ്ടുതവണയായി ഏഴായിരം കോടിയുടെ അധികവരുമാനം ലഭിക്കുന്നവിധം നിരക്ക് കൂട്ടണമെന്നാണ് ബോര്‍ഡ് ആവശ്യപ്പെട്ടത്.ജനുവരി ഒന്ന് മുതലാണ് പുതിയ നിരക്ക് നിലവിൽ വരേണ്ടിയിരുന്നത്.എന്നാൽ നിരക്ക് പരിഷ്‌ക്കരണ നടപടികൾ പൂർത്തിയാകാത്തതിനാൽ നിലവിലുള്ള നിരക്കിന്റെ പ്രാബല്യം മാർച്ച് വരെ നീട്ടി.പതിനെട്ടാം തീയതി പ്രഖ്യാപിക്കുന്ന പുതിയ നിരക്കിന് ജനുവരി ഒന്ന് മുതൽ മുൻകാല പ്രാബല്യം നൽകാനും സാധ്യതയുണ്ട്.