February 2018

കാസർകോഡ്:ആയമ്പാറ ചെക്കിപ്പള്ളത്തെ സുബൈദ കൊല്ലപ്പെട്ട കേസിൽ അറസ്റ്റിലായ രണ്ടു പ്രതികളെ തിരിച്ചറിയൽ പരേഡിന് വിധേയരാക്കി.കേസിൽ അറസ്റ്റിലായ കോട്ടക്കണിയിലെ കെ.എം.അബ്ദുൽഖാദർ എന്ന ഖാദർ (26), പട്ള കുതിരപ്പാടിയിലെ പി.അബ്ദുൽ അസീസ് എന്ന ബാവ അസീസ് (23) എന്നിവരെയാണ് തിരിച്ചറിയൽ പരേഡിന് വിധേയരാക്കിയത്.കാഞ്ഞങ്ങാട് ജില്ലാ ജയിലിൽ ഹൊസ്ദുർഗ് ഒന്നാം ക്ലാസ് മജിസ്ട്രേട്ടിന്റെ (രണ്ട്) നേതൃത്വത്തിലാണു തിരിച്ചറിയൽ പരേഡ് നടത്തിയത്.കഴിഞ്ഞ വെള്ളിയാഴ്ച അറസ്റ്റ് രേഖപ്പെടുത്തിയ രണ്ടു പ്രതികളെയും ചെക്കിപ്പള്ളത്തെ വീട്ടിലെത്തിച്ചു തെളിവെടുപ്പ് നടത്തിയിരുന്നു.രണ്ടു പ്രതികളെയും വീണ്ടും കസ്റ്റഡിയിൽ വിട്ടുകിട്ടുന്നതിനു കോടതിയെ സമീപിക്കുമെന്ന് അന്വേഷണ ഉദ്യോഗസ്ഥനായ ബേക്കൽ സിഐ വി.കെ.വിശ്വംഭരൻ പറഞ്ഞു.ജനുവരി 19ന് ആണു ചെക്കിപ്പള്ളത്തെ വീടിനകത്തു സുബൈദയെ മരിച്ച നിലയിൽ കണ്ടത്. കേസിൽ പിടികിട്ടാനുള്ള രണ്ടു പ്രതികൾക്കായി തിരച്ചിൽ ഊർജിതമാക്കിയിട്ടുണ്ട്.

കടമ്പൂർ:പ്രോജക്ടർ ആവശ്യമില്ലാത്ത അത്യാധുനിക സ്മാർട്ട് ക്ലാസ്റൂം സംവിധാനവുമായി കടമ്പൂർ ഹയർസെക്കൻഡറി സ്കൂൾ. ക്ലാസ്മുറികളിൽ ഒരുക്കിയ അൾട്രാ ഹൈടെക് ഡിജിറ്റൽ ഹൈ ഡെഫിനിഷൻ ടച്ച് ഡിസ്പ്ലേ സംവിധാനത്തിന്‍റെ ഉദ്ഘാടനം ഇന്നു വൈകുന്നേരം അഞ്ചിന് നടക്കുമെന്ന് സ്കൂൾ മാനേജർ പി.മുരളീധരൻ, പ്രിൻസിപ്പൽ കെ.രാജൻ എന്നിവർ‌ അറിയിച്ചു.ഹോങ്കോംഗ് ആസ്ഥാനമായി പ്രവർ‌ത്തിക്കുന്ന അന്താരാഷ്‌‌ട്ര ഡിജിറ്റൽ ബ്രാൻഡായ സ്പെക്ട്രോണുമായി ചേർന്നാണ് പദ്ധതി നടപ്പാക്കുന്നത്.വെള്ളിയാഴ്ച നടക്കുന്ന സ്കൂൾ വാർഷികത്തിന്റെ ഭാഗമായി പുതിയ സാങ്കേതിക സംവിധാനത്തിന്റെ ഉൽഘാടനം  സ്പെക്ട്രോൺ വൈസ് പ്രസിഡന്റ് ജോൺ കാസിഡി നിർവഹിക്കും.പുതിയ സംവിധാനം നിലവിൽ വരുന്നതോടെ അൾട്രാ ഹൈടെക് ഡിജിറ്റൽ എച്.ഡി ടച്ച് സ്ക്രീൻ സാങ്കേതിക വിദ്യ പ്രയോജനപ്പെടുത്തിയാണ് ക്ലാസുകൾ നടത്തുക.സാധാരണ ഹൈടെക് ക്ലാസ് മുറികളിലെ പോലെ കംപ്യൂട്ടർ, പ്രൊജക്ടർ, സ്പീക്കർ തുടങ്ങിയവ ഇവിടെ ആവശ്യമില്ല. ഇവയെല്ലാം അടങ്ങിയ 86 ഇഞ്ച് എൽഇഡി സ്മാർ‌ട്ട് ബോർഡാണ് ക്ലാസ്മുറികളിൽ ഒരുക്കിയിരിക്കുന്നത്. ആവശ്യാനുസരണം മാറ്റിസ്ഥാപിക്കാൻ കഴിയുമെന്നതാണ് ഇതിന്‍റെ പ്രത്യേകത.എഴുതാനുള്ള ബോർഡായും ഉപയോഗിക്കാം.ത്രീഡി സ്റ്റിമുലേഷൻ സംവിധാനവുമുണ്ട്.എഴുതാനും വരയ്ക്കാനും കഴിയുന്നതിനൊപ്പം നേരത്തെ എഴുതിയവയിലേക്ക് തിരിച്ചുപോകാനുള്ള സൗകര്യവുമുണ്ട്. വീഡിയോ ദൃശ്യങ്ങൾക്കൊപ്പം എഴുതിക്കാണിക്കാനുള്ള  സംവിധാനവുമുണ്ട്. കെമിസ്ട്രി, ഫിസിക്സ് തുടങ്ങിയവയുടെ ചെറിയ ലബോറട്ടറിയായും പ്രയോജനപ്പെടുത്താം.സ്മാർട്ട് ഫോൺപോലെ അധ്യാപകർക്ക് എളുപ്പത്തിൽ ഉപയോഗിക്കാനും കഴിയും.കടമ്പൂർ ഹയർസെക്കൻഡറി സ്കൂളിന്‍റെയും കടമ്പൂർ ഇംഗ്ലീഷ് മീഡിയം സ്കൂളിന്‍റെയും സംയുക്ത വാർഷികാഘോഷവും കലാവിരുന്നും സംഗീതജ്ഞൻ കാഞ്ഞങ്ങാട് രാമചന്ദ്രൻ ഉൽഘാടനം ചെയ്യും.

കണ്ണൂർ:ദേശീയ വിരവിമുക്ത ദിനാചരണത്തിന്റെ ഭാഗമായി വിരഗുളികകൾ നൽകി. വിരവിമുക്ത ദിനാചരണത്തിന്റെ ജില്ലാതല ഉൽഘാടനം കണ്ണൂർ സെന്റ് തെരേസാസ് സ്കൂളിൽ വിദ്യാർത്ഥിനി അഭിരാമി വേണുഗോപാലിന് അൽബാൻഡസോൾ ഗുളിക നൽകി മന്ത്രി രാമചന്ദ്രൻ കടന്നപ്പള്ളി നിർവഹിച്ചു.ദേശീയ വിരവിമുക്ത ദിനാചരണത്തോടനുബന്ധിച്ച് ജില്ലയിലെ ഒന്നുമുതൽ പത്തൊൻപതു വയസ്സ് വരെയുള്ള 640734 കുട്ടികൾക്ക് ഗുളിക നൽകി. വ്യാഴാഴ്ച ഗുളിക കഴിക്കാൻ സാധിക്കാത്ത കുട്ടികൾക്ക് സമ്പൂർണ്ണ വിരവിമുക്ത ദിനമായ 15 ന് ഗുളിക നൽകും.

കണ്ണൂർ:കുട്ടികളെ തട്ടിക്കൊണ്ടുപോകാൻ എത്തിയതാണെന്നാരോപിച്ച് ബീഹാർ സ്വദേശിയെ മർദിച്ച സംഭവത്തിൽ നാലുപേരെ അറസ്റ്റ് ചെയ്തു.മാനന്തേരിയിലെ ഇല്ലിക്കൽ മുനാഫിർ, സി.ഷിജു, എ.രാജീവൻ,വി.വിശ്വനാഥൻ എന്നിവരെയാണ് കണ്ണവം പോലീസ് അറസ്റ്റ് ചെയ്തിരിക്കുന്നത്.സംഭവത്തിൽ പതിനാറുപേർക്കെതിരെയാണ് പോലീസ് കേസെടുത്തിരിക്കുന്നത്. മർദനത്തിൽ പരിക്കേറ്റ ബീഹാർ സ്വദേശിയായ ചോട്ടുവിനെ കണ്ണവം പോലീസ് ഇന്നലെ കോടതിയിൽ ഹാജരാക്കി.മാനസിക വൈകല്യം പ്രകടിപ്പിക്കുന്ന ഇയാളെ വൈദ്യപരിശോധനയ്ക്കായി കോഴിക്കോട് മെഡിക്കൽ കോളേജിൽ പ്രവേശിപ്പിച്ചു. കുട്ടികളെ തട്ടിക്കൊണ്ടുപോകാൻ എത്തിയതാണെന്ന സംശയത്തെ തുടർന്ന് നാട്ടുകാരുടെ ചോദ്യം ചെയ്യലിനിടെയാണ് ഇയാൾക്ക് മർദനമേറ്റത്.ഇതിന്റെ ദൃശ്യങ്ങൾ സമൂഹമാധ്യമങ്ങൾ വഴി പ്രചരിപ്പിക്കുകയും ചെയ്തു.സംശയത്തിന്റെ പേരിൽ അക്രമം നടത്തുന്നവർക്കെതിരെയും വ്യാജ വാർത്തകൾ പ്രചരിപ്പിക്കുന്നവർക്കെതിരെയും കർശന നടപടി സ്വീകരിക്കണമെന്ന് ഡിജിപി ലോക്നാഥ് ബെഹ്‌റ കഴിഞ്ഞ ദിവസം പൊലീസിന് നിർദേശം നൽകിയിരുന്നു.ഇതിനെ തുടർന്നാണ് പോലീസ് നടപടി ശക്തമാക്കിയത്.