February 2018

തിരുവനന്തപുരം:കെഎസ്ആർടിസിയിൽ അഞ്ചുമാസമായി മുടങ്ങിക്കിടക്കുന്ന പെൻഷൻ കുടിശ്ശിക വിതരണം ഇന്ന് തുടങ്ങും.രാവിലെ 11 മണിക്ക് കെഎസ്ആർടിസി തമ്ബാനൂർ ബസ് ഡിപ്പോയിൽ വെച്ച് മുഖ്യമന്ത്രി പിണറായി വിജയൻ പെൻഷൻ വിതരണം ഉൽഘാടനം ചെയ്യും. സഹകരണ വകുപ്പും കെഎസ്ആർടിസിയും സർക്കാരും ചേർന്ന് ധാരണ പത്രം ഒപ്പു വെച്ചതിന്റെ അടിസ്ഥാനത്തിലാണ് നടപടി.നിലവിലുള്ള തീരുമാനത്തിന്റെ അടിസ്ഥാനത്തിൽ സഹകരണ കൺസോർഷ്യം വഴി ജൂലൈ വരെ പെൻഷൻ വിതരണം ചെയ്യും.219 കോടി രൂപയാണ് പെൻഷൻകാരുടെ കുടിശ്ശിക പെൻഷൻ നല്കാൻ ഈ മാസം വേണ്ടി വരുന്നത്. തുടർമാസങ്ങളിൽ കൃത്യമായ പെൻഷൻ തുക അതാതു സഹകരണ ബാങ്കുകളിലെ കെഎസ്ആർടിസി പെൻഷൻകാരുടെ അക്കൗണ്ടുകളിൽ നിക്ഷേപിക്കും.സംസ്ഥാനത്താകെ 39045 പെൻഷൻകാരാണുള്ളത്.പെൻഷൻകാർ തൊട്ടടുത്ത സഹകരണ ബാങ്കിൽ അക്കൗണ്ട് തുടങ്ങുന്നതിനു പിന്നാലെ കുടിശ്ശിക അടക്കമുള്ള പെൻഷൻ തുക നിക്ഷേപിക്കും.

തിരുവനന്തപുരം:നിരക്ക് വർധന ആവശ്യപ്പെട്ട് സ്വകാര്യ ബസുടമകൾ നാലു ദിവസമായി നടത്തി വരുന്ന സമരം പൊളിയുന്നു.സർക്കാർ നിലപാട് കടുപ്പിച്ചതിനെ തുടർന്ന് ചിലയിടങ്ങളിൽ സ്വകാര്യ ബസുകൾ നിരത്തിലിറങ്ങിത്തുടങ്ങി.സമരത്തിലേർപ്പെട്ടിരിക്കുന്ന ബസുകളുടെ പെർമിറ്റ് റദ്ദാക്കാൻ ആർടിഒ മാർക്ക് ഗതാഗത കമ്മീഷണർ നിർദേശം നൽകിയതിന് പിന്നാലെയാണിത്.തിരുവനന്തപുരം ജില്ലയിൽ ഒരു വിഭാഗം സ്വകാര്യ ബസുകൾ സർവീസ് തുടങ്ങി. സിറ്റി ബസുകളാണ് നിരത്തിലിറങ്ങിയത്.മറ്റു ജില്ലകളിലും ഒറ്റപ്പെട്ട സർവീസുകൾ ആരംഭിച്ചിട്ടുണ്ട്.സമരം തുടരണോ എന്ന കാര്യം ചർച്ച ചെയ്യാൻ ഒരു വിഭാഗം ബസുടമകൾ ഇന്ന് തൃശൂരിൽ യോഗം ചേരുന്നുണ്ട്.

കണ്ണൂർ:മട്ടന്നൂരിൽ യൂത്ത് കോൺഗ്രസ് നേതാവ് ഷുഹൈബ് കൊല്ലപ്പെട്ട കേസിൽ അന്വേഷണ  വിവരങ്ങൾ ചോരുന്നതായുള്ള ഗുരുതര ആരോപണവുമായി കണ്ണൂർ എസ്പി ശിവവിക്രം. അന്വേഷണ സംഘത്തിലെ ഉദ്യോഗസ്ഥർ റെയ്ഡ് ഉൾപ്പെടെയുള്ള വിവരങ്ങൾ ചോർത്തുന്നതായി എസ്പി ശിവവിക്രം ഡിജിപി,എഡിജിപി, ഐജി എന്നിവരെ അറിയിച്ചു.ഇതിനെ തുടർന്ന് അന്വേഷണത്തിനായി പ്രത്യേക സംഘത്തെ നിയോഗിച്ചതായി ഡിജിപി ലോക്നാഥ് ബെഹ്‌റ അറിയിച്ചു.കണ്ണൂർ റേഞ്ച് ഐജി മഹിപാൽ യാദവിന്റെ നേതൃത്വത്തിലുള്ള സംഘത്തിനാണ് അന്വേഷണ ചുമതല.അന്വേഷണ വിവരങ്ങൾ ചോർത്തുന്നവർക്കെതിരെ കർശന നടപടികൾ സ്വീകരിക്കുമെന്നും ബെഹ്‌റ വ്യക്തമാക്കി.