ഇരിട്ടി:ഇരിട്ടിയിൽ യൂത്ത് കോൺഗ്രസ് നേതാവിന് വെട്ടേറ്റു.യൂത്ത് കോൺഗ്രസ് പേരാവൂർ നിയോജക മണ്ഡലം സെക്രട്ടറിയായ പായം വട്ട്യറ കരിയാലിലെ ജിജോ പുളിയാനിക്കാട്ടിനാണ്(35) വെട്ടേറ്റത്.ബുധനാഴ്ച രാത്രി ഒൻപതരയോടുകൂടി കരിയാൽ ടൗണിലെ കടയിൽ കോൺക്രീറ്റ് ജോലി ചെയ്തുകൊണ്ടിരിക്കുകയായിരുന്ന ജിജോയെ കാറിലെത്തിയ അക്രമിസംഘം ആയുധമുപയോഗിച്ച് വെട്ടുകയായിരുന്നു.അക്രമത്തിൽ ജിജോയുടെ വലതുകാലിനു ആഴത്തിൽ വെട്ടേൽക്കുകയും ഇടതു കാലിന്റെ എല്ല് പൊട്ടുകയും ചെയ്തു.ജിജോയെ മംഗളൂരുവിലെ ആശുപത്രിയിൽ പ്രവേശിപ്പിച്ചിരിക്കുകയാണ്.സംഭവത്തിന് പിന്നിൽ സിപിഎം ആണെന്ന് യൂത്ത് കോൺഗ്രസ് ആരോപിച്ചു.ജിജോയെ അടിച്ചു നിലത്തിട്ടു ശേഷം ആറംഗ സംഘത്തിലെ രണ്ടുപേർ നിലത്തിരുന്ന് വെട്ടുകയായിരുന്നുവെന്ന് ദൃക്‌സാക്ഷികൾ പറഞ്ഞു.ആക്രമിക്കാൻ ക്വട്ടേഷൻ നൽകിയ വ്യക്തി നിന്നെ കൊല്ലരുതെന്ന് പറഞ്ഞിട്ടുണ്ടെന്നും അതിനാൽ നിന്നെ ജീവനോടെ വിടുകയാണെന്നും അക്രമികളിലൊരാൾ പറഞ്ഞതായി ജിജോ പൊലീസിന് മൊഴി നൽകിയിട്ടുണ്ട്.ഇരിട്ടി സിഐ രാജീവൻ വലിയവളപ്പിൽ,എസ്.ഐ പി.എം സുനിൽകുമാർ എന്നിവർ സംഭവസ്ഥലത്തെത്തി പരിശോധന നടത്തി.ജിജോയുടെ മൊഴിയുടെ അടിസ്ഥാനത്തിൽ ആറുപേർക്കെതിരെ പോലീസ് കേസെടുത്തിട്ടുണ്ട്.