മുംബൈ:പ്രധാനമന്ത്രി നരേന്ദ്ര മോദിക്ക് നേരെ രാസാക്രമണം നടത്തുമെന്ന് ഭീഷണി മുഴക്കിയ യുവാവ് പിടിയിൽ. ജാര്‍ഖണ്ഡ് സ്വദേശിയായ കാശിനാഥ് മണ്ഡല്‍ (22) എന്ന യുവാവാണ് പിടിയിലായത്. നാഷണല്‍ സെക്യൂരിറ്റി ഗാര്‍ഡ് (എന്‍എസ്ജി) കണ്‍ട്രോള്‍ റൂമില്‍ വിളിച്ച് വെള്ളിയാഴ്ചയാണ് ഇയാള്‍ ഭീഷണി മുഴക്കിയത്. തുടര്‍ന്ന് എന്‍എസ്ജി നല്‍കിയ വിവരത്തിന്‍റെ അടിസ്ഥാനത്തിലാണ് മുംബൈ ഡിബി മാര്‍ഗ് പോലീസ് ഇയാളെ കസ്റ്റഡിയിലെടുത്തത്.കാശിനാഥിന്‍റെ മൊബൈല്‍ നമ്പർ പിന്തുടര്‍ന്നു നടത്തിയ അന്വേണഷത്തിലാണ് ഇയാള്‍ പിടിയിലായത്. അടുത്തിടെ ജാര്‍ഖണ്ഡില്‍ നടന്ന നക്സല്‍ ആക്രമണത്തില്‍ തന്‍റെ സുഹൃത്ത് കൊല്ലപ്പെട്ടിരുന്നുവെന്നും ഈ സാഹചര്യത്തില്‍ പ്രധാനമന്ത്രിയെ നേരില്‍ കാണുന്നതിനു വേണ്ടിയാണ് ഭീഷണി മുഴക്കിയതെന്നും കാശിനാഥ് പോലീസിനു മൊഴി നല്‍കി. ഇയാൾക്കെതിരെ ഐപിസി 505 പ്രകാരം പോലീസ് കേസെടുത്തു.