ഇരിട്ടി:ആറളം ഫാമിലെ ജീവനക്കാർക്കും 223 ആദിവാസി തൊഴിലാളികൾക്കും രണ്ടുമാസമായി ശമ്പളമില്ല.ഡിസംബർ,ജനുവരി മാസങ്ങളിലെ ശമ്പളമാണ് മുടങ്ങിയിരിക്കുന്നത്.ശമ്പളത്തിനുള്ള വരുമാനം ഫാമിൽ നിന്നും ലഭിക്കാതായതോടെയാണ് സാമ്പത്തിക പ്രതിസന്ധി ഉടലെടുത്തിരിക്കുന്നത്.80 ദിവസമായി കൂലി ലഭിക്കാതായതോടെ പട്ടിക വർഗ വികസന വകുപ്പിന് കീഴിലുള്ള ആറളം ഫാമിങ് കോർപറേഷനിലെ ജീവനക്കാരും തൊഴിലാളികളും ഉൾപ്പെടെ 445 പേർ പട്ടിണിയിലേക്ക് നീങ്ങുകയാണ്.കശുവണ്ടി സീസൺ ആരംഭിച്ചതിനാൽ മറ്റ് ജോലിക്ക് പോകാൻ കഴിയാത്ത അവസ്ഥയിലുമാണ്.ജോലി സമയത്ത് ഫാമിന്റെ വകയായി ലഭിക്കുന്ന ഉച്ചഭക്ഷണം മാത്രമാണ് പലരുടെയും ആശ്രയം.പ്രതിസന്ധി പരിഹരിക്കാൻ 5.69 കോടി രൂപ അനുവദിക്കണമെന്ന് കാണിച്ച് സർക്കാരിന് നൽകിയ അപേക്ഷയിൽ 2.50 കോടി രൂപ മാത്രമാണ് ആറുമാസം മുൻപ് അനുവദിച്ചത്.ബാക്കി തുക കൂടി അനുവദിക്കണമെന്നു കാണിച്ച് നൽകിയ അപേക്ഷ ഇപ്പോഴും സർക്കാരിന്റെ പരിഗണന കാത്ത്കിടക്കുകയാണ്. കാർഷികോല്പന്നങ്ങളുടെ വിലത്തകർച്ചയും കാട്ടു മൃഗങ്ങൾ കൃഷി നശിപ്പിക്കുന്നത് മൂലം ഉണ്ടായിരിക്കുന്ന പ്രതിസന്ധിയുമാണ് പ്രശ്നം രൂക്ഷമാക്കിയിരിക്കുന്നത്. ബുധനാഴ്ച ജില്ലയിൽ സമാധാനയോത്തിലെത്തുന്ന പട്ടികവർഗ വികസന മന്ത്രി എ.കെ ബാലൻ ഫാമിലെ പ്രതിസന്ധി കൂടി പരിഹരിക്കാൻ നടപടിയെടുക്കുമെന്ന വിശ്വാസത്തിലാണ് ജീവനക്കാർ.