തൃശൂര്‍: ചാവക്കാട് കൊവിഡ് ബാധിച്ച്‌ മരിച്ച സ്ത്രീയുടെ മൃതദേഹം ഖബറടക്കി. കൊവിഡ് പ്രോട്ടോകള്‍ പാലിച്ച്‌ ഇന്ന് രാവിലെ ആറേകാലോടെയായിരുന്നു ഖബറടക്കം. അഞ്ചങ്ങാടി കട്ടുങ്ങല്‍ പരേതനായ മുഹമ്മദിന്റെ ഭാര്യ പോക്കാക്കില്ലത്ത് ഖദീജക്കുട്ടിയാണ്(73) ബുധനാഴ്ച കൊവിഡ് ബാധിച്ച്‌ മരിച്ചത്.ചാവക്കാട് ആശുപത്രിയില്‍ സൂക്ഷിച്ചിരുന്ന മൃതദേഹം കടപ്പുറം അടിത്തിരുത്തി ജുമാമസ്ജിദിലാണ് ആരോഗ്യവകുപ്പിന്റെ പരിശീലനം ലഭിച്ച സന്നദ്ധപ്രവര്‍ത്തകരുടെ നേതൃത്വത്തില്‍ ഖബറടക്കം നടത്തിയത്.മറ്റ് ആരെയും മൃതദേഹത്തെ സമീപിക്കാന്‍ അനുവദിച്ചില്ല.മഹാരാഷ്ട്രയില്‍നിന്ന് ഇന്നലെയാണ് ഖദീജക്കുട്ടി കേരളത്തിലെത്തിയത്. പാലക്കാട് വഴി കാറിലായിരുന്നു യാത്ര. പ്രമേഹരോഗിയായ ഇവര്‍ക്ക് ശ്വാസതടസവും അനുഭവപ്പെട്ടതിനെത്തുടര്‍ന്ന് മെയ് 20 ന് പുലര്‍ച്ചെ ആംബുലന്‍സില്‍ ചാവക്കാട് താലൂക്ക് ആശുപത്രിയില്‍ പ്രവേശിപ്പിക്കുകയായിരുന്നു. സ്ഥിതി ഗുരുതരമായതിനെ തുടര്‍ന്ന് മെഡിക്കല്‍ കോളജിലേക്ക് മാറ്റാന്‍ ശ്രമിച്ചെങ്കിലും അതിനു മുൻപ് മരിച്ചു.