കണ്ണൂർ:പ്രവാസികളും അന്യ സംസ്ഥാനത്തുള്ള മലയാളികളും എത്തിത്തുടങ്ങിയതോടെ കണ്ണൂരിൽ കൊവിഡ് രോഗികളുടെ എണ്ണം ഉയരുന്നു.മൂന്നു പേര്‍ക്ക് കൂടി ഇന്നലെ ജില്ലയില്‍ കൊവിഡ് ബാധ സ്ഥിരീകരിച്ചു. ഇതില്‍ ഒരാള്‍ ആരോഗ്യ പ്രവര്‍ത്തകയാണെന്നത് ആശങ്ക സൃഷ്ടിക്കുന്നുണ്ട്.രോഗം സ്ഥിതികരിച്ച രണ്ടു പേര്‍ മുംബയില്‍ നിന്നും എത്തിയവരാണ്. മുംബയില്‍ നിന്ന് ഈ മാസം ഒന്‍പതിന് ജില്ലയിലെത്തിയ ചൊക്ലി സ്വദേശിയായ 35കാരനും പത്തിന് എത്തിയ പയ്യാമ്പലം സ്വദേശിയായ 31കാരനുമാണ് പുതുതായി രോഗം ബാധിച്ച രണ്ടു പേര്‍.സമ്പർക്കത്തിലൂടെയാണ് ആരോഗ്യ പ്രവര്‍ത്തകയ്ക്ക് രോഗം ബാധിച്ചത്.ആരോഗ്യ പ്രവര്‍ത്തക ചിറക്കല്‍ സ്വദേശിയായ 54കാരിയാണ്. കണ്ണൂര്‍ ഗവ. മെഡിക്കല്‍ കോളേജ് ആശുപത്രി, അഞ്ചരക്കണ്ടിയിലെ കൊവിഡ് ചികിത്സാ കേന്ദ്രം, തലശ്ശേരി ജനറല്‍ ആശുപത്രി, കണ്ണൂര്‍ ജില്ലാ ആശുപത്രി എന്നിവിടങ്ങളിലായാണ് ഇവര്‍ നിരീക്ഷണത്തില്‍ കഴിയുന്നത്.