കണ്ണൂർ:നഗരത്തിൽ പട്ടാപകൽ കാട്ടുപന്നിയിറങ്ങിയത് ജനങ്ങളെ പരിഭ്രാന്തരാക്കി.ഇന്നലെ രാവിലെ 10.30 ഓടെയാണ് പ്രഭാത് ജംഗ്ഷന് സമീപം കാട്ടുപന്നിയെ കണ്ടത്. നഗരത്തിരക്കിൽപ്പെട്ട് വെകിളി പിടിച്ച കാട്ടുപന്നി ഇവിടെയുള്ള സിറ്റി യൂണിയൻ ബാങ്കിന്‍റെ എടിഎം കൗണ്ടറിന്‍റെ ചില്ല് വാതിൽ കുത്തിത്തകർത്തു. ഈസമയം കൗണ്ടറിൽ ആളില്ലാത്തതിനാൽ അപകടം ഒഴിവായി. സമീപത്തുള്ള മറ്റു കടകളുടെ ചില്ലുകളിൽ തലകൊണ്ടിടിച്ചെങ്കിലും കട്ടികൂടിയ ഗ്ലാസുകളായതിനാൽ തകർന്നില്ല. ജനങ്ങൾ ഒച്ചവെച്ചതോടെ പന്നി ഓടിരക്ഷപ്പെടുകയായിരുന്നു. സമീപത്തെ കുറ്റിക്കാടുകളിൽ നിന്നാകാം പന്നിയെത്തിയതെന്ന് സംശയിക്കുന്നു.