തിരുവനന്തപുരം: നെയ്യാറ്റിന്‍കരയില്‍ കിടപ്പുരോഗിയായ ഗൃഹനാഥനെ കഴുത്തറുത്ത് കൊലപ്പെടുത്തിയ കേസില്‍ ഭാര്യ അറസ്റ്റില്‍. കൊല്ലപ്പെട്ട ഗോപിയുടെ ഭാര്യ സുമതിയെ ആണ് അറസ്റ്റു ചെയ്തത്. മെഡിക്കല്‍ കോളജ് ആശുപത്രിയില്‍ കഴിയുന്ന സുമതിയുടെ അറസ്റ്റ് പോലീസ് രേഖപ്പെടുത്തി.പക്ഷാഘാതത്തെ തുടര്‍ന്ന് പതിനഞ്ചു വര്‍ഷമായി കിടപ്പിലാണ് ഗോപി. ദുരിതം സഹിക്കാന്‍ കഴിയാതെയാണ് കൊലപാതകം നടത്തിയതെന്ന് സുമതി പോലീസിന് മൊഴി നല്‍കി. കുടുംബ വീടിന്റെ പണി നടക്കുന്നതിനാല്‍ താത്ക്കാലികമായി കെട്ടിയ ഒറ്റമുറി ഷെഡിലാണ് ഗോപിയെ കൊല്ലപ്പെട്ട നിലയില്‍ കണ്ടെത്തിയത്. ഭാര്യ സുമതിയെ സമീപത്തുള്ള കുളക്കരയില്‍ ബോധംകെട്ട് കിടക്കുന്നതായും കണ്ടെത്തിയിരുന്നു. ആശുപത്രിയില്‍ എത്തിച്ച ശേഷമാണ് ഇവര്‍ക്ക് ബോധം തിരിച്ചുകിട്ടിയത്.രാവിലെ പതിവുപോലെ മകന്‍ ഭക്ഷണവുമായി എത്തിയപ്പോഴാണ് സംഭവം പുറത്തറിഞ്ഞത്.ഭര്‍ത്താവിന്റെ ദുരിതം കണ്ടുനില്‍ക്കാന്‍ വയ്യെന്നും ഇനി നോക്കാന്‍ പറ്റില്ലെന്നും സുമതി നേരത്തെ മകനോട് പറഞ്ഞിരുന്നു. മകള്‍ക്കൊപ്പമായിരുന്ന സുമതി അഞ്ചുദിവസം മുന്‍പാണ് വീട്ടില്‍ തിരിച്ചെത്തിയത്.