നാദാപുരം: ചെക്യാട് കായലോട്ടുതാഴെ വീടിനകത്തു പൊള്ളലേറ്റു ഗുരുതരനിലയില്‍ ചികിത്സയിലായിരുന്ന നാലംഗ കുടുംബത്തില്‍ ബാക്കിയുണ്ടായിരുന്ന ഭാര്യയും മകനും കൂടി മരിച്ചു. കീറിയപറമ്പത്ത് രാജുവിന്റെ ഭാര്യ റീന (40), ഇളയ മകന്‍ സ്റ്റെഫിന്‍ (14) എന്നിവരാണ് ഇന്നലെ മരിച്ചത്. രാജു (45) ചൊവ്വാഴ്ചയും മൂത്ത മകന്‍ സ്റ്റാലിഷ് (17) ബുധനാഴ്ചയും മരിച്ചിരുന്നു. രാജുവിന്റേയും മൂത്തമകന്‍ സ്റ്റാലിഷിന്റേയും ചിതയെരിഞ്ഞു തീരും മുമ്പേയാണ് വ്യാഴാഴ്ച ഉച്ചയോടെ റീനയുടെ മരണവിവരം നാട്ടുകാരറിയുന്നത്.പോസ്റ്റുമോര്‍ട്ടത്തിനുള്ള നടപടിക്രമങ്ങള്‍ തീര്‍ത്ത് സംസ്കാര ചടങ്ങിന് കാത്തിരിക്കെ ഇളയ മകന്‍ സ്റ്റഫിനും മരണത്തിലേക്ക് നീങ്ങുകയായിരുന്നു. രാജുവും റീനയും തമ്മിലുള്ള ചെറിയ പിണക്കങ്ങള്‍ കടുംകൈക്ക് രാജുവിനെ പ്രേരിപ്പിച്ചെന്ന നിഗമനത്തിലാണ് പൊലീസ് അന്വേഷണം നടക്കുന്നത്.ഇത്രയും കൊടുംക്രൂരത കാട്ടാന്‍ തക്കവിധമുള്ള വിഷയങ്ങള്‍ ഒന്നുമില്ലെന്നാണ് നാട്ടുകാര്‍ പറയുന്നത്. ദുരന്തദിവസം സമീപത്തെ വീട്ടില്‍ വിവാഹ ഒരുക്കങ്ങള്‍ക്ക് അയല്‍ വീട്ടുകാരോടൊപ്പം മക്കളുമൊന്നിച്ച്‌ പോയി തിരിച്ചെത്തി കിടന്നുറങ്ങിയവരാണ് പുലര്‍ച്ചയോടെ തീഗോളമായി മാറിയത്.പ്രദേശത്തെ മിക്ക പരിപാടികളിലും സജീവ സാന്നിധ്യമായിരുന്നു റീനയും മക്കളും. എന്നാല്‍, രാജു പൊതുവെ നാട്ടുകാരുമായി അകലം പാലിക്കുന്ന പ്രകൃതക്കാരനായിരുന്നു. റീനയുടെയും സ്റ്റഫിന്റെയും മൃതദേഹം കോഴിക്കോട് മെഡിക്കല്‍ കോളജ് ആശുപത്രിയില്‍ പോസ്റ്റ്മോര്‍ട്ടത്തിനുശേഷം വെള്ളിയാഴ്‌ച സംസ്കരിക്കും.