പുതുപ്പള്ളി:ഉമ്മന്‍ ചാണ്ടി നേമത്ത് മത്സരിക്കുന്നതിനെതിരെ പുതുപ്പള്ളിയില്‍ വ്യാപക പ്രതിഷേധം.ഉമ്മന്‍ ചാണ്ടിയെ നേമത്ത് മത്സരിക്കാന്‍ വിട്ടുനല്‍കില്ലെന്ന വാദവുമായാണ് പുതുപ്പള്ളിയില്‍ കോണ്‍ഗ്രസ്സ് പ്രവര്‍ത്തകരുടെ പ്രതിഷേധം.നേമത്ത് സ്ഥാനാര്‍ത്ഥിയാകണമെന്ന ഹൈക്കമാന്‍ഡിന്റെ ആവശ്യം ഉമ്മന്‍ ചാണ്ടി അംഗീകരിച്ചുവെന്ന റിപ്പോര്‍ട്ട് പുറത്ത് വന്നതോടെയാണ് പ്രതിഷേധവുമായി പ്രവര്‍ത്തകര്‍ പുതുപ്പള്ളിയിലെ വീടിന് മുന്നിലേക്ക് എത്തിയത്.’വിട്ടു തരില്ല, വിട്ടു തരില്ല, നേമത്തേക്ക് വിട്ടുതരില്ല’ എന്ന മുദ്രാവാക്യവുമായാണ് പ്രവര്‍ത്തകര്‍ പ്രതിഷേധത്തില്‍ അണിനിരക്കുന്നത്.അൻപത് വര്‍ഷം തങ്ങളെ പ്രതിനിധീകരിച്ച ഉമ്മന്‍ ചാണ്ടിയെ നേമത്തേക്ക് വിട്ടുതരില്ലെന്ന് പറഞ്ഞാണ് വനിതാ പ്രവര്‍ത്തകരടക്കമുള്ള പുതുപ്പള്ളിയിലെ കോണ്‍ഗ്രസ് പ്രവര്‍ത്തകരുടെ പ്രതിഷേധം.സീറ്റു ചര്‍ച്ചകള്‍ക്ക് ശേഷം ഡല്‍ഹിയില്‍ നിന്ന് രാവിലെയോടെയാണ് ഉമ്മന്‍ചാണ്ടി പുതുപ്പള്ളിയിലെത്തിയത്. ഉമ്മന്‍ ചാണ്ടിയെത്തിയ കണ്ടതോടെ പ്രതിഷേധം അണപൊട്ടി. വാഹനം തടഞ്ഞുനിര്‍ത്തിയ പ്രവര്‍ത്തകര്‍ ഏറെ വൈകാരികമായാണ് പ്രതികരിച്ചത്. ചിലര്‍ കരഞ്ഞുകൊണ്ടാണ് പുതുപ്പള്ളി വിടരുതെന്ന് അദ്ദേഹത്തോട് ആവശ്യപ്പെട്ടത്.അതിനിടെ ഒരു പ്രവര്‍ത്തകന്‍ വീടിന് മുകളില്‍ കയറി ആത്മഹത്യ ഭീഷണിയും മുഴക്കി.കേരളത്തില്‍ ബിജെപിയുടെ ഏകസീറ്റായ നേമത്ത് യുഡിഎഫ് സ്ഥാനാര്‍ത്ഥിയായി ഒരു പ്രമുഖ നേതാവിനെ കോണ്‍ഗ്രസ് രംഗത്തിറക്കുമെന്ന് കഴിഞ്ഞ കുറേ ദിവസങ്ങളായി റിപ്പോര്‍ട്ടുണ്ടായിരുന്നു. പ്രതിപക്ഷ നേതാവ് രമേശ് ചെന്നിത്തലയുടെ പേരും ഉയര്‍ന്നുകേട്ടിരുന്നു. ഉമ്മന്‍ ചാണ്ടി തന്നെ നേമത്ത് ബിജെപിയെ നേരിടുന്നത് സംസ്ഥാനത്താകെ അനുകൂല പ്രതികരണമുണ്ടാക്കുമെന്നാണ് ഹൈക്കമാന്‍ഡ് വിലയിരുത്തുന്നത്.