ഇടുക്കി:ഇടുക്കിയിൽ കനത്ത മഴയിൽ വ്യാപക നാശനഷ്ടം.രാജക്കാട് കള്ളിമാലി വ്യൂ പോയിന്റിന് താഴെ ഞായറാഴ്ച പുലര്‍ച്ചെ ഉരുള്‍പൊട്ടി. ഇവിടെ ഒന്നരയേക്കര്‍ കൃഷിയിടം ഒലിച്ചുപോയി. ആളപായം ഇല്ല.കട്ടപ്പന കുട്ടിക്കാനം റോഡില്‍ ആലടിക്ക് സമീപം മണ്ണിടിച്ചിലുണ്ടായി ഗതാഗതം തടസപ്പെട്ടു. അടിമാലി 200 ഏക്കര്‍ മയിലാടുംകുന്നില്‍ മരം ഒടിഞ്ഞു വീണ് വൈദ്യുതി ലൈന്‍ തകര്‍ന്നു. ഇടുക്കി കരിമ്ബന്‍ കട്ടിംഗില്‍ മരം കടപുഴകി ഓട്ടോയുടെ മുകളില്‍ വീണ് ഓട്ടോ ഡ്രൈവര്‍ ഷാജി ജോസഫിന് പരിക്കേറ്റു. കല്ലാര്‍ വട്ടയാറില്‍ മണ്ണിടയില്‍ പോയ രണ്ടുപേരെ അടിമാലി താലൂക്ക് ആശുപത്രിയിൽ പ്രവേശിപ്പിച്ചു.ജില്ലയിലെ പ്രധാന റോഡുകളെല്ലാം വന്‍മരങ്ങള്‍ കടുപുഴകി ഗതാഗതം പൂര്‍ണമായും നിലച്ച സ്ഥിതിയിലാണ്.പലയിടങ്ങളിലും വൈദ്യുതി പൂര്‍ണമായും മുടങ്ങി.മണിക്കൂറുകളോളം ജില്ലയിലെ പ്രധാന നഗരങ്ങളെല്ലാം വെള്ളത്തിലായി.ജില്ലയില്‍ വരും ദിവസങ്ങളിലും മഴശക്തമാകുമെന്നാണ് കാലാവസ്ഥാ നിരീക്ഷണകേന്ദ്രം അറിയിച്ചിട്ടുള്ളത്. ജനങ്ങള്‍ രാത്രിക്കാല യാത്രകളിലടക്കം ജാഗ്രത പുലര്‍ത്തണമെന്ന് ജില്ല ദുരന്ത നിവാരണ വകുപ്പും അറിയിച്ചിട്ടുണ്ട്.