ഇടുക്കി: മഴയുടെ ശക്തി കുറഞ്ഞതോോടെ മുല്ലപ്പെരിയാർ അണക്കെട്ടിലെ ജലനിരപ്പ് നേരിയ തോതിൽ താഴ്ന്നു തുടങ്ങി. നിലവിൽ 138.45 അടിയാണ് ഡാമിലെ ജലനിരപ്പ്. അണക്കെട്ടിലേയ്‌ക്കുള്ള നീരൊഴുക്കും കുറഞ്ഞതായി അധികൃതർ അറിയിച്ചു.ജലനിരപ്പ് താഴ്ന്നതിനെ തുടർന്ന് സ്പിൽവേ ഷട്ടറുകൾ ഇന്ന് താഴ്തിയേക്കും. ആറ് ഷട്ട്‌റുകളാണ് ഉയർത്തിയിട്ടുള്ളത്. ഇടുക്കിയിലേയ്‌ക്ക് സെക്കന്റിൽ 2599 ഘനയടിയും തമിഴ്‌നാട്ടിലേയ്‌ക്ക് 2350 ഘനയടി ജലവുമാണ് ഒഴുക്കിവിടുന്നത്.ഇന്നലെ മുല്ലപ്പെരിയാർ ഡാമിന്റെ മൂന്ന് ഷട്ടറുകൾ കൂടി തുറന്നിരുന്നു. നാല് മണിയോടെയാണ് ഷട്ടറുകൾ 50 സെന്റീമീറ്ററുകൾ വീതം തുറന്നത്. 1299 ഘനയടി ജലം അധികമായി സ്പിൽവേയിലൂടെ പുറത്തേക്ക് ഒഴുക്കി വിടുമെന്നാണ് തമിഴ്‌നാട് സർക്കാർ അറിയിച്ചിരുന്നത്. കഴിഞ്ഞ ദിവസം മന്ത്രിമാരായ റോഷി അഗസ്റ്റിനും പി പ്രസാദും അണക്കെട്ട് സന്ദർശിച്ചിരുന്നു.കൂടുതൽ ഷട്ടറുകൾ തുറന്നതോടെ, പെരിയാർ നദിയുടെ കരകളിൽ താമസിക്കുന്നവർ ജാഗ്രത പാലിക്കണമെന്നും ആവശ്യമായ മുൻകരുതൽ സ്വീകരിച്ചിട്ടുള്ളതിനാൽ പരിഭ്രാന്തരാകേണ്ടതില്ലെന്നും ഇടുക്കി ജില്ലാ കളക്ടർ അറിയിച്ചു.