കൊച്ചി: വാഗമണ്ണിലെ ലഹരിപ്പാര്‍ട്ടിക്കിടെ അറസ്റ്റിലായവരില്‍ മോഡലും. തൃപ്പൂണിത്തുറക്കാരിയായ മോഡല്‍ ചില സിനിമകളിലും അഭിനയിച്ചിട്ടുണ്ട്. മാതാപിതാക്കള്‍ ബംഗാളുകാരാണ്.എന്നാൽ മോഡല്‍ ജനിച്ചതും വളര്‍ന്നതും കൊച്ചിയിലാണ്. ചില സിനിമകളിലും അഭിനയിച്ചിട്ടുണ്ട്. അതേസമയം പാര്‍ട്ടിയില്‍ പങ്കെടുക്കാനെത്തിയ 49 പേരെ മാതാപിതാക്കളെ വിളിച്ചുവരുത്തി പോലീസ് വിട്ടയച്ചു. ഡിഐജി നേരിട്ട് രക്ഷകര്‍ത്താക്കളുമായി സംസാരിച്ചു. ആവശ്യമെങ്കില്‍ ഇവരെ വീണ്ടും ചോദ്യം ചെയ്യും. വാഗമണ്ണില്‍ ലഹരി നിശാപാര്‍ട്ടി സംഘടിപ്പിച്ചത് അറസ്റ്റിലായ നബീലും സല്‍മാനുമെന്നാണു പോലീസ് പറയുന്നത്. “ആട്രാ ആട്രാ’ എന്ന വാട്സ്‌ആപ് കൂട്ടായ്മയിലൂടെയാണ് പാര്‍ട്ടി സംഘടിപ്പിച്ചത്. കോഴിക്കോട് സ്വദേശി അജയനും തൊടുപുഴ സ്വദേശി അജ്മലും ആയിരുന്നു വാട്സ്‌ആപ് കൂട്ടായ്മയുടെ അഡ്മിനുകള്‍.മൂന്നു പേരുടെ പിറന്നാള്‍ ആഘോഷത്തിനാണു വാഗമണ്ണില്‍ പാര്‍ട്ടി സംഘടിപ്പിച്ചത്. ചെലവും ഇവരുടെ വകയായിരുന്നു. കൂട്ടായ്മയിലുള്ളത് സംസ്ഥാനത്തിന്‍റെ വിവിധ ഭാഗങ്ങളില്‍ നിന്നുള്ള 17 പേരാണ്. ലഹരി മരുന്നില്‍ ഭൂരിഭാഗവും എത്തിച്ചതു തൊടുപുഴ സ്വദേശിയായ സഹീറെന്നും പോലീസ് കണ്ടെത്തി. നിശാപാര്‍ട്ടിക്ക് എത്തിച്ച എല്‍എസ്ഡി സ്റ്റാന്പ്, എംഡിഎംഎ, ഹെറോയിന്‍, കഞ്ചാവ് ഉള്‍പ്പെടെയുള്ള മാരക ലഹരി വസ്തുക്കള്‍ പോലീസ് പിടിച്ചെടുത്തിരുന്നു. ലോക്കല്‍ പോലീസിനെ അറിയിക്കാതെ ആയിരുന്നു നര്‍ക്കോട്ടിക്ക് സെല്ലിന്‍റെ മിന്നല്‍ പരിശോധന.