കണ്ണൂർ:കാലാവധി അവസാനിക്കാൻ ഒരു വർഷം മാത്രം ശേഷിക്കേ കണ്ണൂർ കോർപറേഷൻ പിടിച്ചെടുക്കാൻ മേയർക്കെതിരെ യുഡിഎഫ് കൊണ്ടുവന്ന അവിശ്വാസ പ്രമേയം പാസായി.ഇതോടെ കോര്പറേഷന് ഭരണം എൽഡിഎഫിന് നഷ്ടമായി.28 പേർ അവിശ്വാസ പ്രമേയത്തെ പിന്തുണച്ചപ്പോൾ 26 പേരാണ് എതിർത്തത്. കോൺഗ്രസ് വിമതനായ ഡെപ്യൂട്ടി മേയർ പി.കെ.രാഗേഷ് യുഡിഎഫിന് അനുകൂലമായി വോട്ട് ചെയ്തതാണ് എൽഡിഎഫിന് തിരിച്ചടിയായത്. നാടകീയതകള്‍ക്കൊടുവിലാണ് കണ്ണൂര്‍ കോര്പറേഷന് ഭരണം എല്‍.ഡി.എഫിന് നഷ്ടമായത്. കൌണ്‍സില്‍ തീരുമാനങ്ങള്‍ സമയബന്ധിതമായി നടപ്പാക്കുന്നില്ല എന്നത് ഉള്‍പ്പെടെയുള്ള കാരണങ്ങള്‍ ചൂണ്ടിക്കാട്ടിയാണ് രാഗേഷ് എല്‍.ഡി.എഫിനുള്ള പിന്തുണ പിന്‍വലിച്ചത്. പി.കെ രാഗേഷിനാവും മേയറുടെ താത്കാലിക ചുമതല.കെപിസിസി ജനറൽ സെക്രട്ടറി സുമ ബാലകൃഷ്ണൻ മേയറാകും. ആറു മാസത്തിനുശേഷം മേയർ സ്ഥാനം ലീഗിനു കൈമാറുമെന്നാണു ധാരണ.ഡെപ്യൂട്ടി മേയറായി പി.കെ.രാഗേഷ് തുടരും.എൽഡിഎഫ് പ്രവർത്തകർ തടഞ്ഞേക്കുമെന്ന ആശങ്കയിൽ യുഡിഎഫ് കൗൺസിലർമാരെ മുഴുവൻ നഗരത്തിലെ നക്ഷത്ര ഹോട്ടലിൽ താമസിപ്പിച്ചശേഷം ഇന്നു പുലർച്ചെ മൂന്നരയോടെ രഹസ്യമായി കോർപറേഷൻ ഓഫിസിൽ എത്തിക്കുകയായിരുന്നു. കെ.സുധാകരൻ എം.പിയുടെ നേതൃത്വത്തിൽ നടത്തിയ ചർച്ചയ്ക്കൊടുവിലാണ് പി.കെ രാഗേഷ് യു.ഡി.എഫ് പാളയത്തിലേക്കെത്തിയത്.