തിരുവനന്തപുരം:തിരുവനന്തപുരം അട്ടക്കുളങ്ങര വനിതാ ജയിലിൽ നിന്നും രണ്ട് വനിതാ തടവുകാർ ജയിൽ ചാടി.മോഷണക്കേസ് പ്രതികളായ വര്‍ക്കല തച്ചോട് അച്യുതന്‍മുക്ക് സജി വിലാസത്തില്‍ സന്ധ്യ, പാങ്ങോട് കല്ലറ കഞ്ഞിനട വെള്ളിയം ദേശം തേക്കുംകര പുത്തന്‍ വീട്ടില്‍ ശില്‍പ എന്നിവരാണ് രക്ഷപ്പെട്ടത്. ഇന്നലെ വൈകിട്ട് നാല് മണിക്ക് തടവുകാരെ ലോക്കപ്പ് ചെയ്യുമ്പോഴാണ് രണ്ടു പേരുടെ കുറവ് കണ്ടെത്തിയത്. തുടർന്ന് നടത്തിയ പരിശോധനയിൽ സന്ധ്യയും പാങ്ങോട് സ്വദേശിനി ശിൽപ്പയും രക്ഷപ്പെട്ടതായി സ്ഥിരീകരിച്ചു.സംഭവം അറിഞ്ഞയുടൻ ജയിൽ ഡി.ജി.പി ഋഷിരാജ് സിങ് അടക്കമുള്ള ഉദ്യോഗസ്ഥർ ജയിലിലെത്തി.വൈകിട്ട് 4.30 ഓടെ രണ്ടു പേരും കുളിക്കാനായി പോകുന്ന ദ്യശ്യങ്ങള്‍ ജയില്‍ സിസിടിവിയില്‍ നിന്നും ലഭിച്ചിട്ടുണ്ട്.ഇതിന് ശേഷം ഇവരെ കാണാതെയാവുകയായിരുന്നു. ഇതോടെയാണ് ഇവര്‍ തടവ് ചാടിയതായി സ്ഥീകരിച്ചത്. തടവുകാരെ ജയിലിനുള്ളിലെ ജോലികള്‍ക്കായി സെല്ലില്‍ നിന്നും പുറത്ത് വിടാറുണ്ട്. വൈകിട്ട് നാലോടെയാണ് തിരികെ സെല്ലിലേക്ക് തടവുകാരെ പ്രവേശിപ്പിക്കുന്നത്. ഇതിനായി എണ്ണമെടുത്തപ്പോഴാണ് രണ്ടുപേരെ കാണാനില്ലെന്ന് തിരിച്ചറിഞ്ഞത്.ജീവനക്കാര്‍ ആദ്യം ജയില്‍ വളപ്പില്‍ തിരച്ചില്‍ നടത്തിയെങ്കിലും കണ്ടെത്താനായില്ല. പിന്നീട് ജയില്‍ ഡിജിപി ഋഷിരാജ് സിങും സംഘവും നടത്തിയ പരിശോധനയിലാണ് രക്ഷപ്പെട്ട വിവരം സ്ഥിതീകരിച്ചത്. ഇവര്‍ക്കായി ഷാഡോ പൊലീസും സ്പെഷല്‍ ബ്രാഞ്ചും തിരച്ചില്‍ ശക്തമാക്കി. റെയില്‍വെ സ്റ്റേഷനുകളിലും ബസ് സ്റ്റാന്‍ഡുകളിലും ഫോട്ടോകള്‍ നല്‍കിയതായി സ്പെഷല്‍ ബ്രാഞ്ച് ഉദ്യോഗസ്ഥര്‍ അറിയിച്ചു.