ശ്രീനഗര്‍: ജമ്മു കശ്മീരില്‍ പരിശീലന പറക്കലിനിടെ സൈനിക ഹെലികോപട്ര്‍ തകര്‍ന്നുവീണ് രണ്ട് പൈലറ്റുമാര്‍ മരിച്ചു.മേജര്‍ രോഹിത് കുമാര്‍, മേജര്‍ അനുജ് രാജ്പുത് എന്നിവരാണ് മരണമടഞ്ഞതെന്ന് നോര്‍ത്ത് കമാന്‍ഡ് ലഫ് ജനറല്‍ വൈ.കെ ജോഷി പറഞ്ഞു.ഉദ്ധംപുരിലെ പട്‌നിടോപ് മേഖലയില്‍ കൊടുംവനത്തിലാണ് കോപ്ടര്‍ തകര്‍ന്നുവീണത്.പ്രദേശവാസികളാണ് ഹെലികോപ്ടര്‍ തകര്‍ന്നു വീണത് ആദ്യം കണ്ടത്. ഹെലികോപ്ടറില്‍ ഉണ്ടായിരുന്ന പൈലറ്റിനെയും കോ പൈലറ്റിനെയും ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. ചൊവ്വാഴ്ച രാവിലെ 10.30-10.45നുമിടയിലാണ് അപകടമെന്ന് പ്രതിരോധ വക്താവ് അറിയിച്ചു. ആര്‍മി ഏവിയേഷന്‍ വിഭാഗം പരിശീലനത്തിന് ഉപയോഗിക്കുന്ന ചീറ്റ ഹെലികോപ്ടര്‍ ആണ് തകര്‍ന്നത്. അപകടം സംബന്ധിച്ച വിശദീകരണം സൈന്യം പിന്നീട് നല്‍കും. കനത്ത മഞ്ഞ് കാഴ്ച തടസപ്പെട്ടതാവാം അപകടത്തിന് കാരണമെന്നാണ് പൊലീസ് പറയുന്നത്. ഓഗസ്റ്റ് മൂന്നിന് ഇന്ത്യന്‍ ആര്‍മിയുടെ മറ്റൊരു ഹെലികോപ്റ്ററും അപകടത്തില്‍പ്പെട്ടിരുന്നു.