കൊച്ചി: എറണാകുളത്തെ ചമ്പക്കര മഹിളാ മന്ദിരത്തിൽ നിന്നും ചാടിപ്പോയ മൂന്ന് പെൺകുട്ടികളിൽ രണ്ട് പേരെ കണ്ടെത്തി.കോഴിക്കോട് നിന്നാണ് ഇവരെ കണ്ടെത്തിയത്. ഇരുവരെയും മെഡിക്കൽ കോളജ് വനിതാ സെല്ലിലേക്ക് മാറ്റി. സംഭവത്തിൽ ഒരാളെ കൂടി കണ്ടെത്താനുണ്ട്.ഇന്നലെ പുലർച്ചെ 3.15ഓടെയായിരുന്നു എറണാകുളത്തെ ചമ്പക്കര മഹിളാ മന്ദിരത്തിൽ നിന്നും മൂന്ന് പേർ ചാടിപ്പോയത്. മന്ദിരത്തിന്റെ രണ്ടാമത്തെ നിലയിൽ നിന്നും സാരി കെട്ടി താഴേക്ക് ഇറങ്ങിയാണ് ഇവർ പുറത്തിറങ്ങിയതെന്ന് പോലീസ് പറഞ്ഞു. ഇതിന്റെ സിസിടിവി ദൃശ്യങ്ങൾ അന്വേഷണ സംഘത്തിന് ലഭിച്ചിരുന്നു.കൊച്ചിയിലെ നിർമാണ ശാലയിൽ ജോലിക്ക് നിൽക്കവെയാണ് ഇവരെ മഹിളാ മന്ദിരത്തിൽ എത്തിച്ചത്. ഒരാൾ കൊൽക്കത്ത സ്വദേശിനിയാണ്. കേസിൽ അന്വേഷണം പുരോഗമിക്കുകയാണെന്ന് പോലീസ് അറിയിച്ചു.