മാനന്തവാടി:കർണാടകയിൽ നിന്നും കേരളത്തിലേക്ക് കടത്തുകയായിരുന്ന 32 കിലോഗ്രാം കഞ്ചാവുമായി രണ്ടു കണ്ണൂർ സ്വദേശികൾ പിടിയിലായി.പുഴാതി കൊറ്റാളിക്കാവിനു സമീപത്തെ നാരങ്ങോളി വീട്ടിൽ നീരജ്(21),പുഴാതി കുഞ്ഞിപ്പള്ളി ചെറുവത്തുവീട്ടിൽ യാഷിർ അറഫാത്ത്(23)എന്നിവരാണ് പിടിയിലായത്.മാനന്തവാടി എക്‌സൈസ് റേഞ്ച് ഇൻസ്പെക്റ്റർ എം.കെ സുനിലിന്റെ നേതൃത്വത്തിൽ തോൽപ്പെട്ടി എക്‌സൈസ് ചെക്ക് പോസ്റ്റിൽ ഉദ്യോഗസ്ഥർ നടത്തിയ വാഹന പരിശോധനയിലാണ് ഇവർ പിടിയിലാകുന്നത്.ഇവർ സഞ്ചരിച്ചിരുന്ന കാറും പോലീസ് കസ്റ്റഡിയിലെടുത്തു.ഒറ്റ നോട്ടത്തിൽ ആർക്കും കണ്ടെത്താൻ പറ്റാത്ത രീതിയിൽ കാറിന്റെ നാല് ഡോറുകളിലും ഡിക്കിയിലും ബോണറ്റിലും ഉള്ള രഹസ്യ അറകളിലാണ് കഞ്ചാവ് ഒളിപ്പിച്ചിരുന്നത്.അര കിലോഗ്രാമിന്റെ 64 പൊതികളാക്കിയാണ് ഇവ സൂക്ഷിച്ചിരുന്നത്.ഇരുവരെയും അടുത്ത ദിവസം മാനന്തവാടി കോടതിയിൽ ഹാജരാക്കിയ ശേഷം വടകര എൻ.ഡി.പി.എസ് കോടതിക്ക് കൈമാറും.