പാപ്പിനിശ്ശേരി:14 കിലോ കഞ്ചാവുമായി പാപ്പിനിശ്ശേരിയിൽ രണ്ടുപേർ പിടിയിൽ.ശനിയാഴ്ച രാവിലെ പത്തുമണിയോടെ പാപ്പിനിശ്ശേരി സിഎസ്‌ഐ പള്ളിക്ക് സമീപത്തുവെച്ചാണ് എക്‌സൈസ് സംഘം ആസൂത്രിതമായി ഇവരെ പിടികൂടിയത്.കല്യാശ്ശേരി കോലത്തുവയൽ സ്വദേശി റാഷിദ്(28),ചിറയ്ക്കൽ സ്വദേശി എൻ എൻ റാഷിദ്(30) എന്നിവരെയാണ് എക്‌സൈസ് സംഘം പിടികൂടിയത്.ഇവർ സഞ്ചരിച്ച കാറിന്റെ വിവിധഭാഗങ്ങളിൽ പായ്‌ക്കറ്റുകളിലാക്കി സൂക്ഷിച്ച നിലയിലായിരുന്നു കഞ്ചാവ്.കാറിന്റെ മെക്കാനിക്കിനെ വിളിച്ചുവരുത്തിയാണ് കാറിന്റെ വിവിധ ഭാഗങ്ങളിൽ നിന്നും പായ്ക്കറ്റുകൾ പുറത്തെടുത്തത്. ഉത്തരമേഖലാ ജോയിന്റ് എക്‌സൈസ് കമ്മീഷണറുടെ സ്പെഷ്യൽ സ്ക്വാർഡും കണ്ണൂർ എക്‌സൈസ് ആന്റി നാർക്കോട്ടിക് സ്പെഷ്യൽ സ്ക്വാർഡും ചേർന്ന് നടത്തിയ പരിശോധനയിലാണ് കഞ്ചാവ് പിടിച്ചെടുത്തത്.