കണ്ണൂർ: എംഡിഎംഎ അടക്കമുള്ള മാരക ലഹരിമരുന്നുമായി കണ്ണൂരിൽ രണ്ട് യുവാക്കൾ പിടിയിൽ. ചെറുഞ്ഞിക്കരി സ്വദേശി ഷിജിൻ പി.കെ, അഞ്ചരക്കണ്ടി സ്വദേശി ലിതിൻ പി.കെ എന്നിവരെയാണ് പോലീസ് പിടികൂടിയത്. മട്ടന്നൂർ പോലീസ് നടത്തിയ വാഹന പരിശോധനക്കിടെയാണ് ഇവർ പിടിയിലാകുന്നത്. ഹാഷിഷ് ഓയിലും എംഡിഎംഎയും അടക്കമുള്ള മാരക മയക്കുമരുന്നുകൾ ഇവരിൽ നിന്നും പോലീസ് പിടിച്ചെടുത്തു. മട്ടന്നൂർ പോലീസ് സ്റ്റേഷൻ പരിധിയിലെ പനയത്താംപറമ്പ് ചെറുഞ്ഞിക്കരി എന്ന സ്ഥലത്ത് നമ്പർ പ്ലെയ്റ്റ് ഇല്ലാത്ത മോട്ടോർ സൈക്കിളിൽ യാത്ര ചെയ്യുകയായിരുന്നു പ്രതികൾ.പോലീസ് വാഹനം നിർത്താൻ ആവശ്യപ്പെട്ടിട്ടും നിർത്താതെ പോയതിനെ തുടർന്ന് ഇവരെ പിന്തുടർന്ന് പിടികൂടുകയായിരുന്നു. തുടർന്ന് നടത്തിയ പരിശോധനയിലാണ് ലഹരിമരുന്ന് കണ്ടെത്തിയത്.