കോഴിക്കോട്: ഫോണിലൂടെയുള്ള അശ്ലീല സംഭാഷണം പുറത്തുവന്നതിനെ തുടര്‍ന്ന് ഗതാഗതമന്ത്രി എ.കെ. ശശീന്ദ്രന്‍ രാജിവെച്ചു. പിണറായി മന്ത്രിസഭയിലെ എന്‍സിപി പ്രതിനിധിയും കോഴിക്കോട് എലത്തൂര്‍ നിന്നുള്ള എം എൽ എ യുമാണ് അദ്ദേഹം. ഒരു സ്വകാര്യ ചാനലാണ് മന്ത്രി സ്ത്രീയെ ഫോണില്‍ വിളിച്ച് അശ്ലീല സംഭാഷണം നടത്തിയെന്ന വാര്‍ത്ത ശബ്ദരേഖ ഉള്‍പ്പെടെ പുറത്തുവിട്ടത്. തുടർന്ന് ശശീന്ദ്രന്‍ മുഖ്യമന്ത്രിയെ വിളിച്ച് രാജിസന്നദ്ധത അറിയിക്കുകയായിരുന്നു. രാജി ഏതെങ്കിലും തരത്തിലുള്ള കുറ്റസമ്മതമല്ലെന്നും ശരിതെറ്റുകളേക്കാള്‍ ധാര്‍മികതയ്ക്ക് പ്രാധാന്യം നൽകുന്നുവെന്നും അദ്ദേഹം വാർത്താസമ്മേളനത്തിലൂടെ അറിയിച്ചു.