കണ്ണൂർ:റെയില്‍വേ ഗേറ്റ് തുറന്ന് വാഹനങ്ങൾ കടന്നുപോകുന്നതിനിടെ ട്രാക്കിലൂടെ ട്രെയിന്‍ എന്‍ജിന്‍ കടന്നുപോയി. ചൊവ്വാഴ്ച ഉച്ചക്ക് 12ഓടെ തലശ്ശേരി ദേശീയപാതയിലെ നടാല്‍ റെയില്‍വേ ഗേറ്റിലാണ് സംഭവം.തലനാരിഴയ്ക്കാണ് ഇവിടെ വൻ ദുരന്തം ഒഴിവായത്.ഒരു ട്രെയിന്‍ ഇതുവഴി കടന്ന് പോയി റെയില്‍വേ ക്രോസിലെ ഗേറ്റ് ഉയര്‍ത്തിയ ഉടനെയായിരുന്നു സംഭവം.ഗേറ്റിനിരുവശവും കാത്തുനിന്ന വാഹനങ്ങള്‍ റെയില്‍വേ ട്രാക്കിലൂടെ സഞ്ചരിക്കുമ്പോൾ കണ്ണൂരില്‍നിന്ന് തലശ്ശേരി ഭാഗത്തേക്ക് ട്രെയിന്‍ എന്‍ജിന്‍ കടന്ന് പോകുകയായിരുന്നു.റെയില്‍വേ ക്രോസ് കടക്കുകയായിരുന്ന ബസ് തലനാരിഴക്കാണ് അപകടത്തില്‍നിന്ന് രക്ഷപ്പെട്ടത്.ട്രെയിന്‍ എന്‍ജിന്‍ പിന്നീട് എടക്കാട് റെയില്‍വേ സ്റ്റേഷനില്‍ പിടിച്ചിട്ടു. സംഭവം റിപ്പോര്‍ട്ട് ചെയ്തിട്ടുണ്ടെന്നും അന്വേഷണം നടക്കുകയാണെന്നും എടക്കാട് റെയില്‍വേ സ്റ്റേഷന്‍ മാനേജര്‍ പറഞ്ഞു.