ബെംഗളൂരു:കർണാടകയിലെ ബെലന്തൂർ തടാകത്തിൽ നിന്നും വിഷവാതകങ്ങളും തീയും ഉയരുന്നു.5000 ത്തോളം സൈനികർ ഒരു ദിവസം മുഴുവൻ നീണ്ടു നിന്ന പരിശ്രമത്തിനൊടുവിൽ തടാകത്തിലെ തീയണച്ചു.എന്നാൽ തടാകത്തിൽ നിന്നും ഉയരുന്ന പുകയും പതയും ഇപ്പോഴും ജനജീവിതം ദുസ്സഹമാക്കുകയാണ്. കുറേനാളുകളായി പുകയുന്ന തടാകത്തിൽ നിന്നും വെള്ളിയാഴ്ച മുതലാണ് തീയും പുകയും ഉയരാൻ തുടങ്ങിയത്.തീ ജനവാസ മേഖലയിലേക്കും സൈനിക താവളത്തിനടുത്തേക്കും പടർന്നു.തുടർന്നാണ് തീയണയ്ക്കാനുള്ള നടപടികൾ ആരംഭിച്ചത്.ശനിയാഴ്ച രാവിലെ വരെ നീണ്ടു നിന്ന പരിശ്രമത്തിനൊടുവിൽ തീയും പുകയും പൂർണ്ണമായും അണയ്ക്കാൻ കഴിഞ്ഞതായി അധികൃതർ അറിയിച്ചു.സമീപത്തുള്ള വ്യവസായശാലകളിൽ നിന്നും തടാകത്തിലേക്ക് ഒഴുക്കിവിടുന്ന രാസവസ്തുക്കൾ,നിർമാണ വസ്തുക്കൾ തുടങ്ങിയവ മൂലമാണ് തടാകം വിഷമയമായത്.ചില സമയങ്ങളിൽ തടാകത്തിൽ നിന്നും മേഘങ്ങൾ പോലെ പത അന്തരീക്ഷത്തിലേക്ക് പറന്നു പൊങ്ങും.കഴിഞ്ഞ മെയ് മാസത്തിലും തടാകത്തിൽ നിന്നും ഇത്തരത്തിൽ തീ പടർന്നിരുന്നു.തടാകത്തിലെ വിഷവും പതയും നീക്കാൻ അധികൃതർ ശ്രമം ആരംഭിച്ചിട്ടുണ്ട്.