ചെന്നൈ : ഇന്ന് മുതൽ തമിഴ്നാട്ടിൽ കടകളിൽ പെപ്സി, കൊക്കക്കോള ഉത്പന്നങ്ങൾ വിൽക്കില്ല. തമിഴ്നാട് വനികർ കോട്ടമൈപ്പ്‌ പേരവൈ, തമിഴ്നാട് ട്രേഡേഴ്സ് ഫെഡറേഷൻ എന്നീ സംഘടനകളാണ് കൊക്കക്കോള, പെപ്സി ഉത്പന്നങ്ങൾക്കെതിരെ ശക്തമായി രംഗത്തെത്തിയത്. സംഘടനയിൽ അംഗങ്ങളായ വ്യാപാരികളോട് പെപ്സി, കൊക്കക്കോള ഉത്പന്നങ്ങൾ മാർച്ച് ഒന്നുമുതൽ കടകളിൽ വില്പന നടത്തരുതെന്ന് നേരത്തെ ഇവർ നിർദേശം നൽകിയിരുന്നു. ഈ സംഘടനയിൽ പതിനഞ്ചു ലക്ഷം വ്യാപാരികൾ അംഗങ്ങളാണ്.
കടുത്ത വരൾച്ച മൂലം കർഷകർ ദുരിതത്തിൽ കഴിയുമ്പോൾ ജലം ഊറ്റിയെടുത്ത് ശീതളപാനീയങ്ങൾ ഉല്പാദിപ്പിക്കുന്നത് തടയുക എന്ന ലക്‌ഷ്യം കുടി ഇതിനു പിന്നിൽ ഉണ്ട്. മലയാളികളുടെ നേതൃത്വത്തിലുള്ള ചെന്നൈ ചായക്കട ഉടമസ്ഥ സംഘവും ഈ തീരുമാനത്തിന് പൂർണ പിന്തുണ നൽകിയിട്ടുണ്ട്.