മലപ്പുറം:ദുരിതാശ്വാസ നിധിയിലേക്ക് കാതിലെ കടുക്കന്‍ ഊരി നല്‍കി മേല്‍ശാന്തി.മങ്കട അങ്ങാടിപ്പുറം തിരുമാന്ധാംകുന്ന് ഭഗവതിക്ഷേത്രത്തിലെ മേല്‍ശാന്തി ശ്രീനാഥ് നമ്പൂതിരിയാണ് തന്റെ കാതില്‍ക്കിടന്ന കടുക്കന്‍ ഊരിക്കൊടുത്ത് പ്രളബാധിതരെ സഹായിച്ചത്.സിപിഐഎം അങ്ങാടിപ്പുറം ലോക്കല്‍ കമ്മിയുടെ നേതൃത്വത്തില്‍ ഫണ്ട് സമാഹരണത്തിന് പ്രവര്‍ത്തകര്‍ക്കാണ് ശ്രീനാഥ് കടുക്കന്‍ നല്‍കിയത്.ദുരിതാശ്വാസനിധിയിലേക്ക് തന്റെ വക ഇതായിരിക്കട്ടെ എന്നു പറഞ്ഞുകൊണ്ടായിരുന്നു ശ്രീനാഥ് നമ്ബൂതിരി സംഭാവന നല്‍കിയത്. അങ്ങാടിപ്പുറം ഏറാന്തോടെ പന്തല കോടത്ത് ഇല്ലത്തെ അംഗമാണ് ശ്രീനാഥ് നമ്ബൂതിരി.
മേല്‍ശാന്തിയുടെ പ്രവൃത്തിയെ അഭിനന്ദിച്ച്‌ മുഖ്യമന്ത്രി രംഗത്തെത്തി. ‘ഇങ്ങനെയുള്ള മനുഷ്യര്‍ ഉള്ളപ്പോള്‍ നമ്മളെ ആര്‍ക്കാണ് തോല്‍പ്പിക്കാന്‍ കഴിയുക’ എന്നാണ് പിണറായി തന്റെ ഫേസ്ബുക് പോസ്റ്റിൽ കുറിച്ചത്.