കോഴിക്കോട്:പ്ലാറ്റ്‌ഫോമിൽ നിർത്തിയിട്ടിരിക്കുകയായിരുന്ന ട്രെയിനിന്റെ ക്യാബിനിൽ കയറി യാത്രക്കാരൻ ലോക്കോപൈലറ്റിനെ മർദിച്ചു.ഇന്നലെ വൈകുന്നേരം 5.55 നു കോയമ്പത്തൂർ-കണ്ണൂർ പാസ്സന്ജർ തിരൂരിൽ നിർത്തിയിട്ടിരുന്നപ്പോഴാണ് ആക്രമണം നടന്നത്. ലോക്കോപൈലറ്റിനെ ആക്രമിക്കുന്നത് കണ്ട് രക്ഷിക്കാൻ ശ്രമിച്ച അസ്സിസ്റ്റന്റ് ലോക്കോ പൈലറ്റിനും മർദനമേറ്റു.സീനിയർ ലോക്കോപൈലറ്റ് കൊയിലാണ്ടി സ്വദേശി പി.കെ ഉണ്ണികൃഷ്ണൻ(52),അസിസ്റ്റന്റ് ലോക്കോപൈലറ്റ് കോഴിക്കോട് തായാട്ടുപറമ്പ് സ്വദേശി അമൽ കൃഷ്ണൻ(30) എന്നിവർക്കാണ് മർദനമേറ്റത്.ഇവരെ കോഴിക്കോട് പി വി എസ് ആശുപത്രിയിൽ പ്രവേശിപ്പിച്ചു.അക്രമം നടത്തിയ പാലക്കാട് തെക്കേപ്പറ്റ സ്വദേശി ശ്രീനാഥിനെ(22) റെയിൽവേ പോർട്ടർമാരെത്തി കീഴ്‌പ്പെടുത്തി പോലീസിലേൽപ്പിച്ചു.ട്രെയിൻ എന്തുകൊണ്ടാണ് വൈകിയോടുന്നത് എന്ന് ചോദിച്ചുകൊണ്ടാണ് ശ്രീനാഥ് ക്യാബിനിലേക്ക് കയറിയതെന്ന് ഉണ്ണികൃഷ്ണൻ പറഞ്ഞു.സംഭവത്തിൽ റെയിൽവേ പോലീസ് അന്വേഷണം ആരംഭിച്ചു.