ന്യൂഡൽഹി:രാജ്യത്ത് രോഗികളുടെ എണ്ണം മൂന്നുലക്ഷംകടന്നു.തുടര്‍ച്ചയായ മൂന്നാം ദിവസവും റിപ്പോര്‍ട്ട് ചെയ്ത മരണസംഖ്യ 300 കടന്നു.പോസിറ്റീവ് കേസുകളിലും മരണസംഖ്യയിലും ഒറ്റ ദിവസത്തെ റെക്കോര്‍ഡ് വര്‍ധനയാണ് റിപ്പോര്‍ട്ട് ചെയ്തിരിക്കുന്നത്. 24 മണിക്കൂറിനിടെ 11,458 പോസിറ്റീവ് കേസുകളും 386 മരണവും റിപ്പോര്‍ട്ട് ചെയ്തു. ഇതുവരെ 8,884 പേരാണ് കോവിഡ് ബാധിച്ച് മരണമടഞ്ഞത്.അതേസമയം തുടര്‍ച്ചയായ നാലാം ദിവസവും രോഗമുക്തരായവരുടെ എണ്ണം ചികിത്സയില്‍ ഉള്ളവരേക്കാള്‍ കൂടുതലായത് രാജ്യത്തിന് നേരിയ ആശ്വാസം പകരുന്നുണ്ട്. 1,54,329 പേരാണ് രോഗമുക്തി നേടിയിരിക്കുന്നത്. 1,45,779 പേരാണ് ചികിത്സയിലുള്ളത്.ജൂണ്‍ മൂന്നിനാണ് കൊവിഡ് കേസുകള്‍ രണ്ട് ലക്ഷം കടന്നത്.പത്ത് ദിവസം കൊണ്ടാണ് ഇത് മൂന്ന് ലക്ഷത്തിലേക്കെത്തുന്നത്. മഹാരാഷ്ട്രയിലും തമിഴ്നാട്ടിലും ഡല്‍ഹിയിലും റെക്കോര്‍ഡ് വേഗതയിലാണ് രോഗവ്യാപനം. മഹാരാഷ്ട്രയില്‍ നിന്നാണ് മൂന്നിലൊന്ന് കേസുകളും റിപ്പോര്‍ട്ട് ചെയ്യുന്നത്. തമിഴ്നാട്ടില്‍ പോസിറ്റീവ് കേസുകള്‍ 40,000 കടന്നു. ഡല്‍ഹിയില്‍ കൊവിഡ് കേസുകളും മരണവും കുതിച്ചുയരുകയാണ്.മേയ് 24ന് കോവിഡ് രോഗികളുടെ എണ്ണത്തിൽ പത്താം സ്ഥാനത്തായിരുന്ന ഇന്ത്യ 18 ദിവസം കൊണ്ടാണ് നാലാം സ്ഥാനത്തായത്.അതിനിടെ രാത്രി ക൪ഫ്യൂ ക൪ശനമാക്കണമെന്ന് കാണിച്ച് കേന്ദ്ര ആഭ്യന്തര മന്ത്രാലയം സംസ്ഥാനങ്ങൾക്ക് കത്തയച്ചു. കോവിഡ് വ്യാപനം രൂക്ഷമായ പശ്ചാത്തലത്തിൽ പ്രധാനമന്ത്രി മുഖ്യമന്ത്രിമാരെ ചര്‍ച്ചക്ക് വിളിച്ചിട്ടുണ്ട്. ജൂൺ 16, 17 തിയ്യതികളിലാണ് ചര്‍ച്ച നടക്കുക. അതേസമയം, രോഗബാധിതര്‍ ഇരട്ടിക്കുന്നതിന്റെ സമയപരിധി 17.4 ദിവസമായി കുറഞ്ഞുവെന്ന് ആരോഗ്യ മന്ത്രാലയം വ്യക്തമാക്കി