കണ്ണൂർ:ലോകത്തിലെ ഏറ്റവും നീളം കൂടിയ സാലഡ് കണ്ണൂരിൽ തയ്യാറാക്കുന്നു.യൂണിവേഴ്‌സല്‍ വേള്‍ഡ് റെക്കോര്‍ഡ് ലക്ഷ്യമാക്കി റഷീദ് കളിനനറി ആര്‍ട്ട് മാസ്റ്റര്‍ ഷെഫ് റഷീദ് മുഹമ്മദിന്‍റെ നേതൃത്വത്തില്‍ പത്തോളം ഷെഫുമാരും നിര്‍മലഗിരി കോളജ് ഹോം സയൻസ് വിഭാഗം വിദ്യാര്‍ഥിനികളും എംആര്‍വിഎച്ച്എസ്എസ് പടന്നസ്‌കൂളിലെ ഫുഡ് ആൻഡ് റസ്റ്റോറന്‍റ് വിദ്യാര്‍ഥികളും അടങ്ങുന്ന 160 പേരാണ് “എക്‌സ്പ്രസോ’ എന്ന പേരിലുള്ള സാലഡ് തയ്യാറാക്കുക.27ന് രാവിലെ 9.30 മുതല്‍ മുണ്ടയാട് ഇന്‍ഡോര്‍ സ്‌റ്റേഡിയത്തില്‍ നടക്കുന്ന പരിപാടിയില്‍ 900 കിലോയോളം പച്ചക്കറികളും പഴങ്ങളും ഉപയോഗിച്ചു ഗ്രീന്‍ പ്രോട്ടോക്കോള്‍ പ്രാവര്‍ത്തികമാക്കി നാലര മണിക്കൂര്‍കൊണ്ടു 9.5 ഇഞ്ച് വീതിയില്‍ 1200 ഓളം അടി നീളമുള്ള സലാഡാണു തയാറാക്കുന്നത്.ഭക്ഷണത്തിലെ സീറോ വേസ്റ്റ് എന്ന തത്വം പൊതുജനങ്ങളിലേക്ക് എത്തിക്കുന്നതിനും വെജിറ്റബിള്‍ സാലഡിന്‍റെ പ്രാധാന്യം യുവതലമുറകളിലേക്കു പകര്‍ന്നുനല്‍കുന്നതിനും കൂടിയാണ് ഇത്തരത്തിലൊരു പരിപാടി സംഘടിപ്പിക്കുന്നത്.രാവിലെ 9.30 ന് ഉദ്ഘാടനം ചെയ്യുന്ന പരിപാടിയില്‍ യൂണിവേഴ്‌സല്‍ റെക്കോര്‍ഡ് ഫോറം ഏഷ്യന്‍ ജൂറി ഗിന്നസ് സത്താര്‍ ആദൂര്‍ മുഖ്യാതിഥി ആയിരിക്കും.കേരളത്തിലെ സോഷ്യല്‍ സര്‍വീസ് മേഖലകളില്‍ പ്രവര്‍ത്തിക്കുന്ന ഒരു കൂട്ടം യുവസംരംഭകരുടെ കൂട്ടായ്മയായ ഗ്രീന്‍ സോഴ്‌സ് കണ്‍സോര്‍ഷ്യമാണു ജില്ലയില്‍ ആദ്യമായി ഇത്തരത്തിലൊരു പരിപാടി നടത്തുന്നത്.