കോഴിക്കോട്:നിപ്പ ബാധിതരെ പരിചരിച്ച നഴ്സുമാരെ പിരിച്ചുവിട്ട ആശുപത്രി അധികൃതരുടെ നടപടിയിൽ പ്രതിഷേധിച്ച് യുണൈറ്റഡ് നഴ്സസ് അസോസിയേഷന്റെ നേതൃത്വത്തിൽ കോഴിക്കോട് ബേബി മെമ്മോറിയൽ ആശുപത്രി ഉപരോധിച്ച നഴ്സുമാരെ പോലീസ് അറസ്റ്റ് ചെയ്തു.സമരം ചെയ്ത നൂറുകണക്കിന് നഴ്‌സുമാരിൽ ഇരുപത്തെട്ട് പുരുഷ നേഴ്‌സുമാരെ അര്‍ധരാത്രി തന്നെ പോലീസ് അറസ്റ്റ് ചെയ്തു. സമരത്തില്‍ പങ്കെടുത്ത സ്ത്രീകളായ നേഴ്‌സിങ് ജീവനക്കാരെ പോലീസ് അറസ്റ്റ് ചെയ്തില്ല.നേരത്തെ മൂന്ന് നഴ്സുമാരെ പുറത്താക്കിയതിനെതിരെ തന്നെ പ്രതിഷേധം ഉയരുകയും തിരിച്ചെടുക്കണം എന്നാവശ്യപ്പെട്ട് സമരം നടക്കുകയും ചെയ്യുന്നതിനിടെ കഴിഞ്ഞ ദിവസം രാത്രി 8 മണിക്കാണ് ഒരു സ്റ്റാഫിനെ കൂടി ബേബി ഹോസ്പിറ്റല്‍ മാനേജ്‌മെന്റ് പുറത്താക്കിയതായി അറിയിച്ച് കത്ത് നല്‍കുന്നത്. ഇതോടെയാണ് സമാധാനപരമായി നടത്തുകയായിരുന്ന സമരം ശക്തമായത്.അറസ്റ്റ് ചെയ്ത പോലീസുകാരടക്കം മാസ്‌ക് വെച്ച്‌ കൊണ്ട് നില്‍ക്കുമ്ബോള്‍ സ്വന്തം ജീവിതത്തേക്കാള്‍ നാടിന്റെ ആരോഗ്യ സംരക്ഷണത്തിന് വേണ്ടി ജീവന്‍ ത്യജിക്കാന്‍ വരെ തയ്യാറായ നേഴ്‌സിങ് ജീവനക്കാരോടുള്ള മാനേജ്മെന്റിന്റെ നടപടിയില്‍ സോഷ്യല്‍ മീഡിയയിലും രോഷം ശക്തമാവുകയാണ്. അതേസമയം ആശുപത്രിയിൽ വർഷങ്ങളായി നടന്നു വരുന്ന നടപടി ക്രമമനുസരിച്ചാണ് ഇവരെ പുറത്താക്കിയതെന്ന് ആശുപത്രി അധികൃതർ വ്യക്തമാക്കി.പ്രവര്‍ത്തന മികവിന്റെ അടിസ്ഥാനത്തിലാണ് ട്രയിനി ബാച്ചില്‍ നിന്നുളളവരെ സ്റ്റാഫാക്കി നിയമിക്കുക.എച്ച്‌ആര്‍ വിഭാഗത്തിന്റെ വിശകലനത്തിന് ശേഷം മോശം പ്രകടനമാണെന്ന് തോന്നിയവരോടാണ് വരേണ്ടെന്ന് പറഞ്ഞത്. ഇക്കാര്യത്തില്‍ മറ്റുള്ള ആരോപണങ്ങൾ അടിസ്ഥാന രഹിതമാണെന്നും ആശുപത്രി അധികൃതർ പറഞ്ഞു.എന്നാൽ ഈ വിശദീകരണം ആശുപത്രിക്ക് അധികൃതർക്ക് തന്നെ തിരിച്ചടിയായിരിക്കുകയാണ്.കേരളത്തിന് ഇന്നുവരെ പരിചയമില്ലാത്ത അതീവഗുരുതരമായ ഒരു രോഗത്തെ പരിചരിക്കാന്‍ പ്രവര്‍ത്തിപരിചയമില്ലാത്ത ട്രെയ്‌നികളെ ആണ് ആശുപത്രി നിയമിച്ചത് എങ്കില്‍ അത് കടുത്ത അനാസ്തയാണെന്നും, മെഡിക്കല്‍ എത്തിക്‌സിന് ചേര്‍ന്ന പ്രവര്‍ത്തിയല്ലെന്നുമുള്ള വിമര്‍ശനവും ഇതോടെ ആശുപത്രിക്കെതിരെ ഉയർന്നു കഴിഞ്ഞു.