തിരുവനന്തപുരം:വാഹനാപകടത്തിൽ പരിക്കേറ്റ് തിരുവനന്തപുരം അനന്തപുരി ആശുപത്രിയിൽ കഴിയുന്ന വയലിനിസ്റ്റ് ബാലഭാസ്‌ക്കറിന്റെ നില ഗുരുതരമായി തുടരുന്നു. തീവ്രപരിചരണ വിഭാഗത്തിലാണ് ബാലഭാസ്‌ക്കറിനെ പ്രവേശിപ്പിച്ചിരിക്കുന്നത്. ചൊവ്വാഴ്ച അദ്ദേഹത്തെ അടിയന്തിര ശസ്ത്രക്രിയയ്ക്ക് വിധേയനാക്കി.അപകടത്തിൽ ബാലഭാസ്‌ക്കറിന്റെ മകൾ മരിച്ചിരുന്നു.ഭാര്യയെയും പരിക്കുകളോടെ ആശുപത്രിയിൽ പ്രവേശിപ്പിച്ചിരിക്കുകയാണ്.ഇവരുടെ ആരോഗ്യസ്ഥിതിയിൽ പുരോഗതിയുള്ളതായി ആശുപത്രി അധികൃതർ അറിയിച്ചു.ചൊവ്വാഴ്ച പുലർച്ചെയുണ്ടായ അപകടത്തിലാണ് ബാലഭാസ്‌ക്കറിനും ഭാര്യ ലക്ഷ്മിക്കും ഡ്രൈവർ അർജുനും പരിക്കേൽക്കുകയും ഇവരുടെ മകൾ തേജസ്വി മരണപ്പെടുകയും ചെയ്തത്.തേജസ്വിയുടെ മൃതദേഹം എംബാം ചെയ്തു സൂക്ഷിച്ചിരിക്കുകയാണ്.തൃശ്ശൂരിൽ നിന്നും ക്ഷേത്ര ദർശനം കഴിഞ്ഞ് മടങ്ങവേ തിരുവനന്തപുരം പള്ളിപ്പുറത്തുവെച്ച് ഇവർ സഞ്ചരിച്ച കാർ മരത്തിലിടിച്ചാണ് അപകടം ഉണ്ടായത്.ഡ്രൈവർ ഉറങ്ങിയതാവാം അപകടകാരണമെന്നാണ് നിഗമനം.