കൊച്ചി:തൊടുപുഴയിൽ അമ്മയുടെ സുഹൃത്തിന്റെ ക്രൂരമർദനത്തിനിരയായി മരണപ്പെട്ട ഏഴു വയസ്സുകാരന്റെ മൃതദേഹം സംസ്‌ക്കരിച്ചു.കോട്ടയം മെഡിക്കല്‍ കോളജ് ആശുപത്രിയിലെ പോസ്റ്റ് മോര്‍ട്ടം നടപടികള്‍ക്ക് ശേഷം രാത്രി 8.30 ഓടെയാണ് മൃതദേഹം സംസ്ക്കരിച്ചത്. തൊടുപുഴ ഡി.വൈ.എസ്.പിയും സി.ഐയും അടക്കമുള്ള പൊലീസ് ഉദ്യോഗസ്ഥര്‍ മൃതദേഹത്തെ അനുഗമിച്ചിരുന്നു.കുട്ടിയുടെ മുത്തശ്ശിയുടെ വീട്ടിലേക്കാണ് മൃതദേഹം എത്തിച്ചത്.മൃതദേഹം വീട്ടിലേക്ക് എത്തിച്ചപ്പോൾ ഒരു ഗ്രാമം മുഴുവൻ തേങ്ങുകയായിരുന്നു. സ്ത്രീകളും കുട്ടികളും വൃദ്ധരുമടക്കം നിരവധിപേരാണ് കുട്ടിയെ ഒരു നോക്കു കാണാന്‍ തടിച്ചുകൂടിയത്.മൃതദേഹം വീട്ടിനുള്ളില്‍ കയറ്റിയ ശേഷം അമ്മയ്ക്കും മൂന്നു വയസുകാരന്‍ സഹോദരനും മുത്തശ്ശിക്കും അടുത്ത ബന്ധുക്കള്‍ക്കും കാണാന്‍ പൊലീസ് അവസരം ഒരുക്കി.രാഷ്ട്രീയ സാമൂഹ്യ രംഗത്തെ പ്രമുഖരും കുട്ടിക്ക് അന്തിമോപചാരം അര്‍പ്പിക്കാനെത്തി. 9.30 ഓടെ സംസ്കാര ചടങ്ങുകള്‍ അവസാനിച്ചു.