ആലപ്പുഴ:വാരാപ്പുഴയിൽ ശ്രീജിത്ത് എന്ന യുവാവ് മരിച്ച സംഭവത്തിൽ പോലീസിനെ പ്രതിക്കൂട്ടിലാക്കി പോസ്റ്റ്മോർട്ടം റിപ്പോർട്ട്.ശ്രീജിത്തിനെ ക്രൂരമായി മർദിച്ചിരുന്നതായി പോസ്റ്റ്മോർട്ടം റിപ്പോർട്ടിൽ പറയുന്നുണ്ട്.അന്തരാവയവങ്ങൾക്ക് ക്ഷതമേറ്റതായും റിപ്പോർട്ടിലുണ്ട്.ആശുപത്രിയിൽ പ്രവേശിപ്പിച്ചപ്പോൾ തന്നെ ശ്രീജിത്തിന്റെ ചെറുകുടലും അടിവയറും മർദ്ദനത്തെ തുടർന്ന് തകർന്നതായി റിപ്പോർട്ടുകൾ പുറത്തുവന്നിരുന്നു.സംഭവം അന്വേഷിക്കുന്നതിനായി പോലീസ് മേധാവി ലോക്നാഥ് ബെഹ്‌റ പ്രത്യേക സംഘത്തെ നിയോഗിച്ചിട്ടുണ്ട്.ക്രൈം ബ്രാഞ്ച് ഐജി ശ്രീജിത്താണ് സംഘത്തിന്റെ മേധാവി.കേസിൽ നിഷ്പക്ഷവും നീതിപൂർവകവും ശാസ്ത്രീയവുമായ അന്വേഷണം ഉറപ്പാക്കുമെന്ന് ലോക്നാഥ് ബെഹ്‌റ പറഞ്ഞു.അന്തരാവയവങ്ങൾക്കേറ്റ ഗുരുതരമായ പരിക്കാണ് മരണകാരണമെന്നാണ് ആശുപത്രി രേഖയിൽ പറയുന്നത്.ശരീരത്തിലെ പരിക്കുകൾക്ക് രണ്ടുദിവസത്തിലേറെ പഴക്കമുള്ളതായും പരിക്കുകളും ക്ഷതങ്ങളും ആയുധം കൊണ്ടുള്ളതല്ല എന്ന മെഡിക്കൽ റിപ്പോർട്ടുകളും പുറത്തുവന്നതോടെ പോലീസ് പ്രതിരോധത്തിലായിരിക്കുകയാണ്.ശനിയാഴ്ച രാവിലെയാണ് വരാപ്പുഴ സ്വദേശി വാസുദേവൻ ആത്മഹത്യ ചെയ്ത സംഭവവുമായി ബന്ധപ്പെട്ട് ശ്രീജിത്തിനെ പോലീസ് പിടികൂടുന്നത്.ഞായറാഴ്ച രാവിലെ ശ്രീജിത്തിനെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു.ഇതിനിടയിലാണ് ശ്രീജിത്തിന് മർദ്ദനമേറ്റതെന്ന സംശയം ബലപ്പെടുത്തുന്നതാണ് പോസ്റ്റ്മോർട്ടം റിപ്പോർട്ട്.