കൊച്ചി:വാരാപ്പുഴയിൽ പോലീസ് കസ്റ്റഡിയിലിരിക്കെ ശ്രീജിത്ത് എന്ന യുവാവ് മരണപ്പെട്ട സംഭവത്തിൽ വരാപ്പുഴ എസ്‌ഐ ദീപക്കിനെ കൊലക്കുറ്റം ചുമത്തി അറസ്റ്റ് ചെയ്തു.ഇയാളെ ഇന്ന് കോടതിയിൽ ഹാജരാക്കും.കേസിൽ ദീപക് ഒന്നാം പ്രതിയായേക്കും.ഇന്നലെ ആലുവ പോലീസ് ക്ലബ്ബിൽ എട്ടുമണിക്കൂറോളം ചോദ്യം ചെയ്ത ശേഷമാണ് ദീപക്കിന്റെ അറസ്റ്റ് രേഖപ്പെടുത്തിയത്. എസ്പിയുടെ സ്‌ക്വാഡിലെ മൂന്നു പോലീസുകാർക്ക് പുറമെ ദീപക്കും ശ്രീജിത്തിനെ ക്രൂരമായി മർദിച്ചെന്ന് കണ്ടെത്തിയതിനെ തുടർന്നാണ് അറസ്റ്റ്.ദീപക്കിനെതിരെ ശ്രീജിത്തിന്റെ അമ്മയും ഭാര്യയും അന്വേഷണ സംഘത്തിന് മുൻപിൽ മൊഴി നല്കിയിരുന്നു.ഇവരുടെ മൊഴികൾ ശരിവയ്ക്കുന്ന മറ്റു തെളിവുകളും ലഭിച്ചതോടെയാണ് അന്വേഷണ സംഘം ദീപക്കും കേസിൽ പ്രതിയാണെന്ന് ഉറപ്പിച്ചത്. അതേസമയം ശ്രീജിത്തിന്റെ കസ്റ്റഡി മരണവുമായി ബന്ധപ്പെട്ട് നേരത്തെ അറസ്റ്റിലായി റിമാൻഡിൽ കഴിയുന്ന ആലുവ റൂറൽ എസ്പിയുടെ പ്രത്യേക സ്‌ക്വാഡിലെ അംഗങ്ങളായിരുന്ന മൂന്നുപേരുടെ ജാമ്യാപേക്ഷ ഇന്ന് പരിഗണിക്കും.