മലപ്പുറം:കുട്ടികളെ തട്ടിക്കൊണ്ടുപോകാനെത്തിയതാണെന്നാരോപിച്ച് പൊന്നാനിയിൽ ആൾക്കൂട്ടം വയോധികനായ യാചകനെ കെട്ടിയിട്ട് നഗ്നനാക്കി മർദിച്ചു.മർദനത്തിൽ തലയ്ക്കും വാരിയെല്ലിനും ഗുരുതരമായി പരിക്കേറ്റ ആന്ധ്രാസ്വദേശിയായ വൃദ്ധനെ പൊന്നാനി താലൂക്ക് ആശുപത്രിയിൽ പ്രവേശിപ്പിച്ചു.സംവത്തിൽ നാലുപേരെ പോലീസ് കസ്റ്റഡിയിൽ എടുത്തിട്ടുണ്ട്.കണ്ടാലറിയാവുന്ന 20 പേർക്കെതിരെയും കേസെടുത്തു.പൊന്നാനി നഴ്സിംഗ് ഹോമിന് സമീപത്തുവെച്ച് ഇന്നലെ രാവിലെ പത്തുമണിയോടെയാണ് സംഭവം.വൃദ്ധനെ ആൾക്കൂട്ടം നിലത്തിട്ടു ചവിട്ടുകയും നഗ്നനാക്കി കെട്ടിയിട്ട് മർദിക്കുകയും ചെയ്തു.മർദന വിവരമറിഞ്ഞെത്തിയ പോലീസുകാർ ഇയാളെ രക്ഷിക്കാൻ ശ്രമിച്ചെങ്കിലും നാട്ടുകാർ പോലീസുകാരെയും മർദിക്കുകയായിരുന്നു. ഇതോടെ കൂടുതൽ പോലീസുകാർ സ്ഥലത്തെത്തി ലാത്തിവീശിയാണ് അക്രമികളെ തുരത്തിയത്.യാചകന്റെ പക്കൽ നിന്നും മിട്ടായിയും ക്ലോറോഫോമും കണ്ടെത്തിയെന്നായിരുന്നു നാട്ടുകാരുടെ പ്രചാരണം.എന്നാൽ പോലീസ് അന്വേഷണത്തിൽ ഇത് നുണയാണെന്ന് തെളിഞ്ഞു.കുട്ടികളെ തട്ടിക്കൊണ്ടുപോകുന്നതായി സോഷ്യൽ മീഡിയകളിലൂടെ നടക്കുന്ന പ്രചരണങ്ങളുടെ പ്രതിഫലനമാണ് നാട്ടുകാരുടെ കയ്യേറ്റത്തിന് പിന്നിലെന്നാണ് ചൂണ്ടിക്കാട്ടുന്നത്.