കോഴിക്കോട്:കോഴിക്കോട് താമരശ്ശേരിയിൽ പ്രവർത്തിക്കുന്ന ധനകാര്യ സ്ഥാപന ഉടമ കുപ്പായക്കോട് ഒളവങ്ങരയിലെ പി.ടി കുരുവിള എന്ന സജി (52)യെ പെട്രോൾ ഒഴിച്ച് തീകൊളുത്തി കൊന്ന കേസിലെ പ്രതിയെ പൊലീസ് അറസ‌്റ്റു ചെയ്തു. ആലപ്പുഴ വള്ളികുന്നം സ്വദേശി സുമേഷ് കുമാറിനെയാണ് മലപ്പുറം ജില്ലയിലെ തിരൂരില്‍ നിന്നും താമരശേരി സി.ഐ ടി.എ.അഗസ്തിയുടെ നേതൃത്വത്തിലുള്ള പൊലീസ് സംഘം പിടികൂടിയത്. വെള്ളിയാഴ്ച ഉച്ചയ്ക്ക് 2.15നാണ് പുതുപ്പാടി കൈതപ്പൊയിയിൽ പ്രവര്‍ത്തിക്കുന്ന മലബാര്‍ ഫിനാന്‍സ് ഉടമ കുപ്പായക്കോട് ഒളവക്കുന്നേല്‍ സജി കുരുവിളയെ പെട്രോള്‍ ഒഴിച്ച് തീ കൊളുത്തിയത്. കുരുവിളയ്ക്ക് 95 ശതമാനം പൊള്ളലേറ്റിരുന്നു.കോഴിക്കോട് മെഡിക്കല്‍ കോളേജ് ആശുപത്രിയിലെ തീവ്രപരിചരണ വിഭാഗത്തില്‍ ചികിത്സയിലായിരുന്ന സജി ഇന്നലെ പുലര്‍ച്ചെ മൂന്ന് മണിക്കാണ് മരിച്ചത്. വായ്പ എടുക്കുന്നതിനായി സുമേഷ് രണ്ട് ദിവസം സജിയുടെ സ്ഥാപനത്തില്‍ എത്തിയിരുന്നു.എന്നാൽ സുമേഷിന്റെ പെരുമാറ്റത്തില്‍ അസ്വാഭാവികത തോന്നിയതിനാലും ആവശ്യപ്പെട്ട തുകയ്ക്ക് ഈട് നല്‍കാന്‍ തയ്യാറാവാത്തതിനാലും സജി പണം നല്‍കിയിരുന്നില്ല.ഇതില്‍ പ്രകോപിതനായ സുമേഷ് കൈയിലുണ്ടായിരുന്ന പെട്രോള്‍ കുരുവിളയുടെ ദേഹത്ത് ഒഴിച്ച് ലൈറ്റര്‍ ഉപയോഗിച്ച്‌ തീയിടുകയായിരുന്നു.