തിരുവനന്തപുരം:സംസ്ഥാനത്ത് ഇളവുകളുടെ ഭാഗമായി ജില്ലയ്ക്കകത്ത് പൊതുഗതാഗതം അനുവദിച്ചെങ്കിലും ബസുകള്‍ സര്‍വീസ് നടത്തില്ലെന്ന് സ്വകാര്യ ബസുടമകള്‍.സര്‍ക്കാര്‍ ഇപ്പോള്‍ നിശ്ചയിച്ച നിബന്ധനകളോടെ ബസ് ഓടിക്കുന്നത് പ്രായോഗികമല്ലെന്നാണ് സ്വകാര്യ ബസുടമകളുടെ നിലപാട്. 50 ശതമാനം ആളുകളുമായി ബസ് ഓടുന്നത് ലാഭകരമല്ലെന്നും, സര്‍ക്കാരിനോട് ചോദിച്ചത് ഇരട്ടി ബസ് ചാര്‍ജ് വര്‍ദ്ധനയാണെന്നുമാണ് ബസുടമകളുടെ പക്ഷം.
വീഡിയോ കോണ്‍ഫറന്‍സിംഗ് വഴി ഇന്ന് ബസുടമകള്‍ യോഗം ചേരുന്നുണ്ട്.11 മണിക്കാണ് യോഗം.ഇതിന് ശേഷം ആവശ്യങ്ങള്‍ അംഗീകരിക്കാതിരുന്നതിലെ പ്രതിഷേധം സര്‍ക്കാരിനെ അറിയിക്കുമെന്നും ബസുടമകള്‍ അറിയിച്ചു.സംസ്ഥാനത്ത് ബസ്, ജലഗതാഗതത്തില്‍ കര്‍ശനനവ്യവസ്ഥകളോടെയാണ് ഇളവുകള്‍ അനുവദിച്ചത്. ബസില്‍ മൊത്തം സീറ്റിന്‍റെ 50 ശതമാനം യാത്രക്കാരെ മാത്രമേ അനുവദിക്കൂ. നിന്ന് യാത്ര ചെയ്യാന്‍ പാടില്ല. ബസ് യാത്രാക്കൂലി കുറഞ്ഞത് 8 രൂപയായിരുന്നത് 12 രൂപയാക്കിയാണ് കൂട്ടിയത്. 20 രൂപയെങ്കിലും കുറഞ്ഞ യാത്രാക്കൂലി വേണമെന്നായിരുന്നു ബസുടമകളുടെ ആവശ്യം. ഡീസല്‍ നികുതി ഒഴിവാക്കണമെന്ന ആവശ്യം സര്‍ക്കാര്‍ അംഗീകരിച്ചതുമില്ല. ഇത് അംഗീകരിക്കാത്തതിലാണ് ബസുടമകള്‍ക്കിടയില്‍ പ്രതിഷേധം.