Hot Topic

കൊച്ചി: മഴക്കാലപൂര്‍വ പ്രതിരോധപ്രവര്‍ത്തനങ്ങളും പരിസരശുചിത്വവും ഊര്‍ജിതമാക്കിയില്ലെങ്കില്‍ കേരളത്തെ കാത്തിരിക്കുന്നത് വന്‍ഭീഷണിയാണെന്ന് ആരോഗ്യവകുപ്പ് മേയ് 16-ന് പുറത്തുവിട്ട പുതിയ കണക്കുകളും വ്യക്തമാക്കുന്നു. എച്ച് 1 എന്‍ 1 പനിക്ക് പുറമെ, വിവിധ പകര്‍ച്ചപ്പനികളും സംസ്ഥാനത്ത് വ്യാപകമായിട്ടുണ്ട്. 3401 പേര്‍ക്കാണ് ഈ വര്‍ഷംമാത്രം ഡെങ്കിപ്പനി സ്ഥിരീകരിച്ചിരിക്കുന്നത്. ഇതില്‍ രണ്ടായിരത്തോളം പേരും തിരുവനന്തപുരം ജില്ലയിലാണ്. ശുചിത്വബോധം ഉണര്‍ത്തുകയും കൊതുകിനെതിരെയും ജല, പരിസ്ഥിതി മലിനീകരണത്തിനെതിരെയും ശക്തമായ മാര്‍ഗങ്ങള്‍ സ്വീകരിച്ചാല്‍ മാത്രമേ പകര്‍ച്ചവ്യാധികള്‍ തടയാന്‍ സാധിക്കു.

തിരുവനന്തപുരം: പോലീസ് സേനയിലെ അച്ചടക്കലംഘനം സര്‍ക്കാര്‍ അനുവദിക്കില്ലെന്ന് മുഖ്യമന്ത്രി പിണറായി വിജയന്‍. പോലീസ് ആസ്ഥാനം അച്ചടക്ക ലംഘനത്തിന്റെ കേന്ദ്രമാണെന്ന തിരുവഞ്ചൂർ രാധാകൃഷ്ണന്റെ ആരോപണത്തോട് പ്രതികരിക്കുകയായിരുന്നു അദ്ദേഹം. വിവാദ പ്രസംഗത്തിന്റെ പേരില്‍ മന്ത്രി എം.എം മണിക്കെതിരെ കേസെടുക്കാതിരുന്നത് നേരിട്ട് കേസെടുക്കാന്‍ കഴിയുന്നവിധത്തിലുള്ള കുറ്റകൃത്യം അദ്ദേഹം ചെയ്തിട്ടില്ലാത്തുകൊണ്ടാണെന്ന് മുഖ്യമന്ത്രി പറഞ്ഞു. സ്ത്രീ വിരുദ്ധ പരാമര്‍ശം അദ്ദേഹത്തില്‍നിന്ന് ഉണ്ടായെന്ന ആരോപണം അടിസ്ഥാനരഹിതമാണ്. .പി സെന്‍കുമാര്‍ വിഷയത്തില്‍ സുപ്രീം കോടതിയെ സമീപിച്ചത് നിയമോപദേശത്തിന്റെ അടിസ്ഥാനത്തിലാണെന്നും  മുഖ്യമന്ത്രി പറഞ്ഞു.

ന്യൂഡൽഹി:   ഗവർണർക്കെതിരെ നിശിത വിമർശനം നടത്തിയ സംസ്ഥാന ബിജെപി നേതാക്കളെ ബിജെപി കേന്ദ്ര നേതൃത്വം കൈവിടുന്നു. കണ്ണൂര്‍ കൊലപാതകങ്ങളില്‍ ഗവര്‍ണര്‍ക്കെതിരെ നീങ്ങിയ  ശോഭാ സുരേന്ദ്രന്റെയും , എം.ടി.രമേശിന്റെയും പ്രസ്താവനകളെ  കേന്ദ്ര ബിജെപി നേതൃത്വം തള്ളിക്കളഞ്ഞു. ഗവർണറുടെ ഭരണഘടനാപദവി മാനിക്കണമെന്ന് കേന്ദ്രമന്ത്രി രാജീവ് പ്രതാപ് റൂഡി പറഞ്ഞു.

ഇരുവരുടെയും പ്രസംഗങ്ങൾ പാർട്ടിക്കുള്ളിൽ തന്നെ വിമർശനമുണ്ടാക്കിയിരുന്നു. മുഖ്യമന്ത്രി പിണറായി വിജയനെ പേടിയാണെങ്കിൽ ഗവർണർ പി.സദാശിവം ഇറങ്ങിപ്പോകണമെന്നാണ് ബിജെപി സംസ്ഥാന ജനറൽ സെക്രട്ടറി ശോഭാ സുരേന്ദ്രൻ ആവശ്യപ്പെട്ടത്.  ബിജെപി സംസ്ഥാന ജനറൽ സെക്രട്ടറി എം.ടി.രമേശ് സമൂഹമാധ്യമത്തിലൂടെയാണ് ഗവർണർക്കെതിരെ രംഗത്തെത്തിയത്.

തിരുവനന്തപുരം: കണ്ണൂരിലെ രാഷ്ട്രീയ കൊലപാതകത്തിന് പിന്നാലെ സി.പി.എം പ്രവര്‍ത്തകര്‍ ആഹ്ലാദ പ്രകടനം നടത്തിയെന്ന വിധത്തിൽ കുമ്മനം രാജശേഖരന്‍ പുറത്തുവിട്ട വീഡിയോയെക്കുറിച്ച് അദ്ദേഹം വിശദീകരിക്കണമെന്ന് മുഖ്യമന്ത്രി പിണറായി വിജയന്‍ പറഞ്ഞു. ആ വീഡിയോ നിയമവിരുദ്ധമാണെന്നും കുമ്മനത്തിനെതിരെ ആവശ്യമെങ്കില്‍ കേസെടുക്കുമെന്നും മുഖ്യമന്ത്രി വ്യക്തമാക്കി.

കണ്ണൂരില്‍ സമാധാന ശ്രമങ്ങളുമായി സര്‍ക്കാര്‍ മുന്നോട്ടുപോകും. കുറ്റവാളികളെ എത്രയും പെട്ടെന്ന് നിയമനത്തിനു മുന്നില്‍ കൊണ്ടുവരും. ഗവര്‍ണര്‍ ചെയ്തതത് ഭരണഘടനനാപരമായ ഉത്തരവാദിത്തമാണ്. അതിന്റെ പേരില്‍ ബിജെപി ഗവര്‍ണര്‍ക്കെതിരെ തിരിയുന്നത് ജനാധിപത്യത്തിന് ചേര്‍ന്നതല്ല. മുഖ്യമന്ത്രി പറഞ്ഞു.