Hot Topic

തിരുവനന്തപുരം:കേരളാ സ്റ്റേറ്റ് റോഡ് ട്രാൻസ്‌പോർട് പ്രൊജക്റ്റ്( കെ.എസ്.ടി.പി) റോഡ് നിർമാണത്തിൽ ഒട്ടേറെ അപാകതകൾ.റോഡ് നിർമാണത്തിൽ അതൃപ്തി പ്രകടിപ്പിച്ച് ലോകബാങ്ക്.രണ്ടാം ഘട്ട നിർമാണ പദ്ധതികൾ സമയത്തിന് പൂർത്തിയാക്കിയില്ലെങ്കിൽ വായ്പ്പതുകയ്ക്കു പുറമെ നിശ്ചിത തുക പിഴയും അടക്കേണ്ടി വരും.മുഴുവൻ പണിയുടെ മുപ്പതു ശതമാനം മാത്രമാണ് ഇത് വരെ പൂർത്തിയാക്കിയിട്ടുള്ളത്.പദ്ധതി പൂർത്തിയാക്കാൻ ഒന്നര വർഷം മാത്രമാണ് ബാക്കി.കെ.എസ്.ടി.പി രണ്ടാം ഘട്ട പ്രവർത്തനത്തിന്റെ പുരോഗതിയും നിലവാരവും വിലയിരുത്തിയ ലോകബാങ്ക് പ്രതിനിധികൾ പദ്ധതിയെ തരം താഴ്ത്തിയതായി ഉദ്യഗസ്ഥർ പറയുന്നു.പദ്ധതി റദ്ദാക്കുന്നതിനു മുൻപുള്ള നടപടിയായിട്ടാണ് തരം താഴ്ത്തലിനെ കണക്കാക്കുന്നത്.തരംതാഴ്ത്തിക്കൊണ്ടുള്ള അറിയിപ്പ് കേന്ദ്ര സർക്കാറിനെയും സംസ്ഥാന സർക്കാരിനെയും അറിയിച്ചതായാണ് വിവരം.നിർദിഷ്ട മാനദണ്ഡങ്ങൾ പാലിക്കാതെയാണ് പണി പൂർത്തിയാക്കിയിരിക്കുന്നത്.പല റോഡുകളുടെയും നിർമാണത്തിൽ ഒട്ടേറെ അപാകതകൾ കണ്ടെത്തിയിട്ടുണ്ട്.രണ്ടാം ഘട്ട പദ്ധതിക്ക് 21.6 കോടി യു.എസ് ഡോളർ(ഏകദേശം 1400 കോടി രൂപ)ആണ് ലോകബാങ്ക് നൽകുന്നത്.2013 ജൂൺ 19 നാണ് ഇത് സംബന്ധിച്ചുള്ള കരാർ ഡൽഹിയിൽ ഒപ്പിട്ടത്.കരാറിന്റെ കാലാവധി 2018 ജൂലൈ 30 ന് അവസാനിക്കും.നിർമാണപ്രവർത്തനങ്ങൾ എല്ലാം പൂർത്തീകരിച്ചു പദ്ധതി അവസാനിപ്പിക്കേണ്ടത് നവംബർ 30 നാണ്.

കൊച്ചി:മൂന്നാറിലെ കയ്യേറ്റമൊഴിപ്പിക്കലുമായി ബന്ധപ്പെട്ട ഉത്തരവിൽ സർക്കാരിനെതിരെ രൂക്ഷ വിമർശനവുമായി ഹൈക്കോടതി.എല്ലാം ശരിയാക്കാൻ ഇനി ആരു വരുമെന്നും രാഷ്ട്രീയ ഇച്ഛാശക്തിയും അർജവവുമാണ് സർക്കാർ കാണിക്കേണ്ടതെന്നും ഹൈക്കോടതി.മൂന്നാറിലെ ലൗഡെയ്ല്‍ കേസുമായി ബന്ധപ്പെട്ടുള്ള വിധിയിലാണ് ജസ്റ്റിസ് വിനോദ് ചന്ദ്രന്‍ സര്‍ക്കാരിനെതിരെ ആഞ്ഞടിച്ചത്.ലൗഡെയ്ല്‍ റിസോര്‍ട്ട് വില്ലേജ് ഓഫീസ് ആക്കാനുള്ള ദേവികളും സബ് കലക്ടറായിരുന്ന ശ്രീറാം വെങ്കിട്ടാരാമന്റെ ഉത്തരവ് ചൂണ്ടിക്കാട്ടി റിസോര്‍ട്ട് പൊതു പൊതു താല്‍പര്യത്തിന് ഉപയോഗിക്കാന്‍ കോടതിക്ക് നിര്‍ദേശിക്കാന്‍ അധികാരമുണ്ടെന്ന് ഹൈക്കോടതി ചൂണ്ടിക്കാട്ടി. അങ്ങനെ ചെയ്തില്ലെങ്കില്‍ അത് ജനവിരുദ്ധമാവുമെന്നും കോടതി പറഞ്ഞു.എല്ലാം ശരിയാക്കും എന്ന് പറഞ്ഞാണ് സർക്കാർ അധികാരത്തിലേറിയത്.പക്ഷെ എല്ലാം ശരിയാക്കാൻ ഇനി ആര് വരും എന്നാണ് കരുതേണ്ടത്.നടപടിയെടുക്കാൻ രാഷ്ട്രീയ ഇച്ഛാശക്തിയും അർജവവുമാണ് സർക്കാർ കാണിക്കേണ്ടത്.എല്ലാം ജനത്തിന്റെ അമിത പ്രതീക്ഷ മാത്രമായി ഒടുങ്ങരുത്.ഒന്നും നടക്കില്ലെന്നു തോന്നുന്നത് പൊതു താല്പര്യത്തിനു വിരുദ്ധമാണെന്നും ഉത്തരവിന്റെ  അവസാനഭാഗത്തുണ്ട്.

കണ്ണൂർ:കണ്ണൂരിലെ ഒരു വിഭാഗം ഓട്ടോക്കാർ ഒരുമാസത്തിലേറെയായി നടത്തിവന്നിരുന്ന സമരം അവസാനിപ്പിക്കാനൊരുങ്ങുന്നു.പ്രശനം ചർച്ച ചെയ്തു പരിഹരിക്കാൻ മേയർ വിളിച്ചു ചേർത്ത സർവകക്ഷി സമ്മേളനത്തിൽ തീരുമാനമായി.പ്രശ്‍നം പരിഹരിക്കാൻ നടപടിയെടുക്കണമെന്ന് ഹൈക്കോടതി നിർദേശിച്ചിരുന്നു.വെള്ളിയാഴ്ച ട്രേഡ് യൂണിയൻ പ്രതിനിധികളുമായി ചർച്ച നടത്താനും ഇതിലുണ്ടാകുന്ന തീരുമാനം ട്രാൻസ്‌പോർട് റെഗുലേറ്ററി കമ്മിറ്റി ചേർന്ന് പരിഹരിക്കാനുമാണ് സർവകക്ഷി യോഗത്തിൽ തീരുമാനമായത്.പ്രശ്ന പരിഹാരത്തിന് ഇടപെടണമെന്ന് കളക്ടർ മേയറോട് ആവശ്യപ്പെട്ടതിനെ  തുടർന്നാണ് ബുധനാഴ്ച കോർപറേഷനിൽ സർവകക്ഷിയോഗം ചേർന്ന് ഇക്കാര്യം പ്രത്യേക അജണ്ടയായി എടുത്തത്.ഓട്ടോ തർക്കത്തിൽ പല അഭിപ്രായങ്ങളാണ് യോഗത്തിൽ ഉണ്ടായത്.പാർക്കിങ് സ്ഥലം നിശ്ചയിക്കാതെ നമ്പർ ഏകീകരണം എന്ന നിലപാടാണ് ഡെപ്യൂട്ടി മേയർ തീരുമാനിച്ചത്.എന്നാൽ ഇതിനോട് സി.പി.എം അംഗങ്ങൾ പോലും യോജിച്ചില്ല.ഇതോടെയാണ് വെള്ളിയാഴ്ച ട്രേഡ് യൂണിയൻ പ്രതിനിധികളുമായി ചർച്ച നടത്താൻ തീരുമാനിച്ചത്.

കൊച്ചി:നടിയെ ആക്രമിച്ച കേസിലെ മുഖ്യപ്രതി പൾസർ സുനി കാക്കനാട് ജയിലിൽ നിന്നും ഫോൺ ചെയ്യുന്നതുൾപ്പെടെ സുപ്രധാന തെളിവുകൾ പോലീസിന് ലഭിച്ചു.ജയിലിലെ സി.സി.ടി.വിയിൽ നിന്നുള്ള ദൃശ്യങ്ങളാണ് ലഭിച്ചത്.സുനി ജയിലിൽ നിന്നും നാദിർഷയെയും ദിലീപിന്റെ മാനേജർ അപ്പുണ്ണിയെയും വിളിക്കാറുണ്ടായിരുന്നു എന്ന സഹതടവുകാരൻ ജിൻസന്റെ മൊഴി ശരിവെക്കുന്ന തരത്തിലുള്ള തെളിവുകളാണ് പൊലീസിന് ലഭിച്ചത്.ദൃശ്യത്തിൽ ജിൻസനെയും വ്യക്തമായി കാണാമെന്നാണ് സൂചന.ജിൻസന്റെ മൊഴിയുടെ അടിസ്ഥാനത്തിൽ കഴിഞ്ഞ മൂന്നു മാസത്തെ ദൃശ്യങ്ങളാണ് പോലീസ് പരിശോധിച്ചത്.