കോട്ടയം:ഇന്നലെ അന്തരിച്ച എൻസിപി നേതാവ് ഉഴവൂർ വിജയൻറെ സംസ്കാരം ഇന്ന് നടക്കും.കോട്ടയം ജില്ലയിലെ കുറിച്ചിത്താനത്തുള്ള കാരാംകുന്നേൽ വീട്ടുവളപ്പിലാണ് സംസ്കാരച്ചടങ്ങുകൾ നടക്കുക.പൂർണ്ണ സംസ്ഥാന ബഹുമതികളോടെയാണ് ചടങ്ങുകൾ നടക്കുക.മുഖ്യമന്ത്രി പിണറായി വിജയൻ ഉൾപ്പെടെയുള്ള നിരവധി പ്രമുഖർ സംസ്‌കാരച്ചടങ്ങിൽ പങ്കെടുക്കും.ഉദരസംബന്ധമായ അസുഖത്തെ തുടർന്ന് കൊച്ചിയിലെ സ്വകാര്യ ആശുപത്രിയിയിൽ ചികിത്സയിലായിരുന്ന ഉഴവൂർ വിജയൻ ഇന്നലെ രാവിലെയാണ് അന്തരിച്ചത്.
കൊച്ചി:പള്ളിത്തർക്കം റിപ്പോർട് ചെയ്യുന്നതിനിടെ മാധ്യമ പ്രവർത്തകനെ പോലീസ് കയ്യേറ്റം ചെയ്തു.മാതൃഭൂമി ന്യൂസ് ലേഖകൻ റിബിൻ രാജുവിന് നേരെയാണ് കയ്യേറ്റമുണ്ടായത്.അദ്ദേഹത്തെ ഭീഷണിപ്പെടുത്തുകയും പിടിച്ചുതള്ളുകയും സ്ഥലത്തു നിന്നും പോകാൻ ആവശ്യപ്പെടുകയും ചെയ്തു.പിറവത്തിനടുത്തുള്ള നെച്ചൂർ പള്ളിയിൽ യാക്കോബായ -ഓർത്തഡോക്സ് വിഭാഗങ്ങൾ തമ്മിലുള്ള തർക്കം റിപ്പോർട് ചെയ്യാൻ പള്ളിയിലെത്തിയതാണ് മാധ്യമ പ്രവർത്തകൻ.വാർത്ത ശേഖരിക്കുന്നതിനിടെ യാതൊരു പ്രകോപനവും കൂടാതെയാണ് പോലീസ് കയ്യേറ്റത്തിന് ശ്രമിച്ചത്.മൂവാറ്റുപുഴ സി.ഐ ജയകുമാറും എസ്.ഐ ലൈജുമോനും ചേർന്നാണ് കയ്യേറ്റം ചെയ്തത്.
തിരുവനന്തപുരം:പീഡനക്കേസിൽ അറസ്റ്റിലായ എം.വിൻസെന്റ് എം.എൽ.എ ക്കു സസ്പെൻഷൻ.എം.എൽ എ ക്കെതിരെ കെ.പി.സി.സി. നടപടിയെടുത്തു.പാർട്ടി പദവികളിൽ നിന്നും എം.എൽ.എ യെ നീക്കി.കുറ്റവിമുക്തനാകും വരെ പാർട്ടി സ്ഥാനങ്ങളിൽ നിന്നും എം.എൽ എ യെ മാറ്റി നിർത്തും.എം.എൽ.എ ക്കെതിരെ നടന്നത് രാഷ്ട്രീയ ഗൂഢാലോചനയാണെന്നു എം.എം ഹസ്സൻ പറഞ്ഞു.വിന്സന്റിനെ പാർട്ടിയിൽ നിന്നും പുറത്താക്കിയിട്ടില്ല.അദ്ദേഹം കുറ്റക്കാരനാണെന്നു തെളിഞ്ഞിട്ടില്ല.ഇത് വെറും ആരോപണം മാത്രമാണ്.അതുകൊണ്ടുതന്നെ കുറ്റവിമുക്തനാകുന്നത് വരെ ധാർമികതയുടെ അടിസ്ഥാനത്തിൽ വിന്സന്റിനെ മാറ്റി നിർത്താനാണ് പാർട്ടി തീരുമാനമെന്നും എം.എം ഹസ്സൻ പറഞ്ഞു.
കൊച്ചി:എൻ.സി.പി സംസ്ഥാന പ്രസിഡന്റ് ഉഴവൂർ വിജയൻ(60) അന്തരിച്ചു.കൊച്ചിയിലെ സ്വകാര്യ ആശുപത്രിയിൽ ഇന്ന് രാവിലെ 6.55 നാണ് അന്ത്യം.കഴിഞ്ഞ ഒരു മാസമായി ഉദരസംബന്ധമായ അസുഖത്തെ തുടർന്ന് ചികിത്സയിലായിരുന്നു.ഈ മാസം പതിനൊന്നിനാണ് അദ്ദേഹത്തെ കോട്ടയത്തെ സ്വകാര്യ ആശുപത്രിയിൽ പ്രവേശിപ്പിച്ചത്.ആരോഗ്യനില മോശമായതിനെ തുടർന്ന് പിന്നീട് അദ്ദേഹത്തെ കൊച്ചിയിലെ സ്വകാര്യ ആശുപത്രിയിലേക്ക് മാറ്റുകയായിരുന്നു.മലിനീകരണ നിയന്ത്രണ ബോർഡ്,എഫ്.സി.ഐ ഉപദേശക സമിതി എന്നിവയിൽ അംഗമായിരുന്നു.കോട്ടയം കുറിച്ചിത്താനം സ്വദേശിയാണ്.ചെറിയ രാഷ്ട്രീയ പാർട്ടിയായിട്ടു പോലും ഇടതുമുന്നണിയിൽ തനതു സ്ഥാനം ഉറപ്പിക്കാൻ എൻ.സി.പി ക്കു സാധിച്ചത് ഉഴവൂർ വിജയൻറെ സാന്നിധ്യമാണ്.കുറിച്ചിത്താനം കരംകുന്നേൽ ഗോവിന്ദൻ നായരുടെയും ലക്ഷ്മിക്കുട്ടിയമ്മയുടെയും ഏകമകനാണ്.
തിരുവനന്തപുരം:വീട്ടമ്മയെ പീഡിപ്പിച്ചെന്ന പരാതിയില്‍ എം വിന്സെന്റ് എംഎല്‍എയെ പൊലീസ് അറസ്റ്റ് ചെയ്തു. എംഎല്‍എ ഹോസ്റ്റലില്‍ മൂന്നു മണിക്കൂറോളം ചോദ്യം ചെയ്തതിന് ശേഷമായിരുന്നു അറസ്റ്റ്. പേരൂര്‍ക്കട പൊലീസ് ക്ലബ്ബിലെത്തിച്ചാണ് അറസ്റ്റ് രേഖപ്പെടുത്തിയത്. പൊലീസ് ക്ലബ്ബിലെത്തിച്ച എംഎല്‍എയെ അജിത ബീഗം ചോദ്യം ചെയ്യുകയാണ്.അതേസമയം വിന്സെന്റ് എം.എല്‍.എ മുന്‍കൂര്‍ ജാമ്യാപേക്ഷ നല്‍കിയിരുന്നു. തിരുവനന്തപുരം ജില്ലാ കോടതിയിലാണ് മുന്‍കൂര്‍ ജാമ്യാപേക്ഷ നല്‍കിയിരുന്നത്.എംഎല്‍എയ്ക്ക് എതിരെ ടെലിഫോണ്‍ രേഖകള്‍ അടക്കം കൂടുതല്‍ തെളിവുകളുണ്ടെന്ന് പൊലീസ് പറഞ്ഞു.സ്ത്രീയെ എംഎല്‍എ നിരന്തരം ഫോണില്‍ വിളിച്ചിരുന്നു. അഞ്ച് മാസത്തിനുള്ളില്‍ 900ത്തലധികം തവണ വിളിച്ചു. 50ലധികം മെസേജുകളുണ്ടെന്നും പൊലീസ് പറയുന്നു.കേസ് ഒതുക്കാന്‍ ശ്രമിക്കുന്നതിന്‍റെ ശബ്ദരേഖയും തിരിച്ചടിയാണ്. അതേസമയം നിരപരാധിയെന്ന് എംഎല്‍എ വിശദീകരിച്ചതായി കെപിസിസി അധ്യക്ഷന്‍ എംഎം ഹസന്‍ പറഞ്ഞു.
കണ്ണൂർ:തപാൽ ഓഫീസുകളിൽ ആരംഭിച്ച ആധാർ തെറ്റുതിരുത്തൽ കൗണ്ടറുകളുടെ പ്രവർത്തനം താൽക്കാലികമായി നിർത്തിവെച്ചു ജൂലൈ ഏഴിന് കണ്ണൂർ ഹെഡ് പോസ്‌റ്റോഫീസിൽ ആരംഭിച്ച കൗണ്ടറാണ് ഒരാഴ്ച തികയും മുൻപ് നിർത്തലാക്കിയത്‌.ആധാർ കാർഡിൽ വന്നിട്ടുള്ള തെറ്റുകൾ തിരുത്താനുപയോഗിക്കുന്ന യൂണിക് ഐഡന്റിഫിക്കേഷൻ അതോറിറ്റി ഓഫ് ഇന്ത്യയുടെ സൈറ്റുകളുടെ പ്രവർത്തനം മന്ദീഭവിച്ചതാണ് സേവനം താൽക്കാലികമായി നിർത്തിവെയ്ക്കാൻ കാരണം.വെബ്സൈറ്റ് പ്രവർത്തനം സാധാരണ നിലയിലെത്തുന്നതോടെ പ്രവർത്തനം പുനരാരംഭിക്കാൻ സാധിക്കുമെന്ന് പോസ്റ്റൽ സൂപ്രണ്ടിന്റെ ഓഫീസിൽ നിന്നും അറിയിച്ചു.ഹെഡ് പോസ്റ്റ് ഓഫീസിലെ പ്രവർത്തനം നിലച്ചിരിക്കുകയാണെങ്കിലും കണ്ണൂർ ഡിവിഷനിലെ എല്ലാ പോസ്റ്റ് ഓഫീസുകളിലും പദ്ധതി വ്യാപിപ്പിക്കുന്നതിനായി 107 ജീവനക്കാർക്കുള്ള പ്രത്യേക പരിശീലനം പൂർത്തിയായി.പദ്ധതി നടപ്പാക്കാനുള്ള യന്ത്രങ്ങൾ പോസ്റ്റ് ഓഫീസുകളിൽ എത്തുന്നതോടെ ഡിവിഷനിലെ രണ്ടു ഹെഡ് പോസ്റ്റോഫീസുകളിലടക്കം 68 പോസ്റ്റോഫീസുകളിലും ജൂലൈ അവസാനത്തോടെ സേവനം ആരംഭിക്കും.
കണ്ണൂർ:കണ്ണൂരിൽ വീണ്ടും ആർ.എസ്.എസ് ആക്രമണം.സി.പി.എം പ്രവർത്തകന് വെട്ടേറ്റു.പാനൂർ സ്വദേശി അരവിന്ദാക്ഷനാണ് വെട്ടേറ്റത്.ഓ.കെ വാസുമാസ്റ്ററുടെ കൂടെ സംഘപരിവാർ ബന്ധം ഉപേക്ഷിച്ച് സി.പി.ഐ.എമ്മുമായി സഹകരിച്ചു പ്രവർത്തിക്കുന്ന ആളാണ് പാനൂർ വൈദ്യർ പീടികയിലെ തുണ്ടിയിൽ അരവിന്ദാക്ഷൻ.
കൊച്ചി:നടി ആക്രമിക്കപ്പെട്ട കേസിൽ റിമാൻഡിൽ കഴിയുന്ന ദിലീപിന്റെ ജാമ്യാപേക്ഷയിൽ കോടതി തിങ്കളാഴ്ച്ച വിധി പറയും.ജാമ്യാപേക്ഷയിൽ വാദം കേൾക്കുന്നത് ഹൈക്കോടതി പൂർത്തിയാക്കിയിരുന്നു.കേസുമായി ബന്ധമുള്ളവരെ സ്വാധീനിക്കാൻ കഴിയുന്ന പ്രതിയായതിനാൽ ദിലീപിന് ജാമ്യം നല്കരുതെന്നാണ് പ്രോസിക്യൂഷൻ ഹൈക്കോടതിയിൽ ആവശ്യപ്പെട്ടത്.കേസിൽ കൂടുതൽ പ്രതികളെ പിടികൂടാനുണ്ടെന്നും ദിലീപിനെ കസ്റ്റഡിയിൽ ആവശ്യമാണെന്നും പ്രോസിക്യൂഷൻ വാദിച്ചിരുന്നു.എന്നാൽ അന്വേഷണവുമായി സഹകരിക്കുന്ന ദിലീപിനെ കസ്റ്റഡിയിൽ ആവശ്യമില്ലെന്നാണ് പ്രതിഭാഗത്തിന്റെ വാദം.
കൊച്ചി: നടി ആക്രമിക്കപ്പെട്ട കേസിൽ പി.ടി തോമസ് എം.എൽ എ യുടെ മൊഴി അന്വേഷണസംഘം രേഖപ്പെടുത്തി.എറണാകുളം ഗസ്റ്റ് ഹൗസിൽ വെച്ചാണ് മൊഴിയെടുത്തത്.സംഭവം നടന്ന ദിവസം താൻ കണ്ടതും കേട്ടതുമായ സംഭവങ്ങളെ കുറിച്ച് അന്വേഷണ സംഘത്തോട് പറയുമെന്ന് മൊഴി നല്കാനെത്തിയപ്പോൾ പി.ടി തോമസ് എം.എൽ.എ മാധ്യമങ്ങളോട് പറഞ്ഞു.അതിനിടെ കേസുമായി ബന്ധപ്പെട്ടു കൂടുതൽ പേരെ ചോദ്യം ചെയ്യാനൊരുങ്ങുകയാണ് പോലീസ്.ദിലീപുമായി സൗഹൃദമുള്ള ഒരു യുവ നടിയെ പോലീസ് ഉടനെത്തന്നെ ചോദ്യം ചെയ്‌തേക്കുമെന്ന് സൂചനയുണ്ട്.ഈ നടിയുടെ ബാങ്ക് അക്കൗണ്ടിലേക്കു വലിയ തുക വന്നതിനെ കുറിച്ചും അന്വേഷിക്കും.അന്വേഷണ സംഘത്തിന് നൽകിയ മൊഴിയിലെ കാര്യങ്ങൾ പുറത്തുപറയാനാകില്ലെന്ന് മൊഴി നൽകി പുറത്തിറങ്ങിയ ശേഷം പി.ടി തോമസ് എം.എൽ.എ വ്യക്തമാക്കി.അക്രമം നടന്ന ദിവസം സംവിധായകൻ ലാലിൻറെ വീട്ടിലെത്തിയപ്പോൾ കണ്ടതും കേട്ടതുമായ കാര്യങ്ങൾ പോലീസിനോട് പറഞ്ഞിട്ടുണ്ടെന്നും അദ്ദേഹം കൂട്ടിച്ചേർത്തു.
കൊച്ചി:നടിയെ ആക്രമിച്ച ദൃശ്യങ്ങൾ പകർത്തിയ മൊബൈൽ ഫോൺ നശിപ്പിച്ചു കളഞ്ഞെന്ന് പൾസർ സുനിയുടെ മുൻ അഭിഭാഷകൻ പ്രതീഷ് ചാക്കോ.കഴിഞ്ഞ ദിവസം ആലുവ പോലീസ് ക്ലബ്ബിൽ വെച്ച് ചോദ്യം ചെയ്തപ്പോഴാണ് പ്രതീഷ് ചാക്കോയുടെ വെളിപ്പെടുത്തൽ.നടിയെ അക്രമിക്കുന്നതിന്റെ ദൃശ്യങ്ങൾ അടങ്ങിയ മൊബൈൽ ഫോൺ സുനി തന്നെ ഏൽപ്പിച്ചുവെന്നും എന്നാൽ താൻ അത് തന്റെ ജൂനിയറായ രാജു ജോസഫിനെ ഏല്പിച്ചു.എന്നാൽ അദ്ദേഹം അത് നശിപ്പിച്ചു കളഞ്ഞു എന്നാണ് പ്രതീഷ് ചാക്കോ പോലീസിനോട് പറഞ്ഞതെന്നാണ് വിവരം.കഴിഞ്ഞ ദിവസം അറസ്റ്റ് ചെയ്തു ജാമ്യത്തിൽ വിട്ട പ്രതീഷ് ചാക്കോയ്‌ക്കെതിരെ കേസിലെ സുപ്രധാന തെളിവ് നശിപ്പിച്ചുകളഞ്ഞതിനും അതിനു കൂട്ട് നിന്നതിനും കൂടുതൽ കുറ്റങ്ങൾ പോലീസ് ചുമത്തിയേക്കും.കേസിലെ സുപ്രധാന തെളിവായ മൊബൈൽ ഫോൺ കണ്ടെടുക്കാൻ പോലീസ് വ്യാപക തിരച്ചിൽ നടത്തിയെങ്കിലും കണ്ടെത്താൻ കഴിഞ്ഞിരുന്നില്ല.ഇത് കണ്ടെത്താൻ ശ്രമം തുടരുന്നതിനിടെയാണ് അഭിഭാഷകന്റെ മൊഴി.