Hot Topic

കൊല്ലം:കൊല്ലം ചവറയിൽ സംഘർഷം തുടരുന്നു.സിപിഎം ഏരിയ സമ്മേളനത്തിന്റെ ഭാഗമായി ഇന്നലെ ചവറയിൽ നടന്ന ബഹുജന റാലിക്ക് ഇടയിലേക്ക് എസ്‌ഡിപിഐ ജാഥ കടന്നു വന്നതോടെയാണ് സംഘർഷം ആരംഭിച്ചത്.സംഘർഷത്തിന്റെ ഭാഗമായി നടന്ന അക്രമത്തിൽ ഒട്ടേറെ പ്രവർത്തകർക്കും വഴിയാത്രക്കാർക്കും പോലീസുകാർക്കും പരിക്കേറ്റു.വാഹനങ്ങൾക്കു നേരെയും കല്ലേറുണ്ടായി.ഇതിനിടെ സിപിഎം വോളന്റിയർമാർ കുറുവടികളുമായി എസ്‌ഡിപിഐ പ്രവർത്തകരെ നേരിട്ടു.ഒട്ടേറെ ബൈക്കുകളും അടിച്ചു തകർത്തു.ഇതിനിടെ അക്രമത്തിൽ നിന്നും രക്ഷനേടാനായി ചിലർ അടുത്തുള്ള കൊറിയർ സർവീസ് കടയിലേക്ക് കയറിയതിനെ തുടർന്ന് അവിടെയെത്തിയ അക്രമിസംഘം കടയിലെ ഫർണിച്ചറുകൾ തകർത്തു.സ്ഥലത്ത് ഇപ്പോഴും സംഘർഷാവസ്ഥ നിലനിൽക്കുകയാണ്.ഇന്ന് എസ്എഫ്ഐ -ഡിവൈഎഫ്ഐ പ്രവർത്തകരുടെ വീടിനുനേരെ പുലർച്ചെയോടെ ആക്രമണം നടന്നു. പന്മന വടക്കുംതല സ്വദേശിയും ഡിവൈഎഫ്ഐ നേതാവുമായ എസ്. ദിലീപിന്‍റെ വീട് അടിച്ചു തകർത്തു. വീട്ടിൽ കിടന്ന നാലുകാറുകളും നശിപ്പിച്ചു. പന്മന ചോലയിൽ എസ്എഫ്ഐ പ്രവർത്തകനായ രതീഷിന്‍റെ വീടും അടിച്ചുതകർത്തു. ചവറ തോട്ടിനുവടക്ക് രാജ് സ്ഥിരന്‍റെ വീടിന്‍റെ ജനൽപാളികൾ തകർത്തു. രണ്ട് കാറുകളും രണ്ട് ബൈക്കുകളും തകർത്തു. വീടിന്‍റെ മുന്നിലിരുന്ന ബൈക്ക് അഗ്നിക്കിരയാക്കുകയും ചെയ്തു.സംഘർഷാവസ്ഥ കണക്കിലെടുത്തു സ്ഥലത്തു വൻ പോലീസ് സന്നാഹം ക്യാമ്പ് ചെയ്യുന്നുണ്ട്.

തളിപ്പറമ്പ്:തളിപ്പറമ്പിൽ അനധികൃത മണൽ കടത്തുകാർ ഉപേക്ഷിച്ച ലോറി  ആക്രികച്ചവടക്കാർക്ക് മറിച്ചു വിറ്റ സംഭവത്തിൽ അഞ്ചു പൊലീസുകാരെ സസ്‌പെൻഡ് ചെയ്തു.തളിപ്പറമ്പ് പോലീസ് സ്റ്റേഷനിലെ എഎസ്ഐ മാത്യു,സിവിൽ പോലീസ് ഓഫീസർ റിജോ നിക്കോളാസ്,ഡ്രൈവർമാരായ രമേശൻ, നവാസ്,സജു എന്നിവരെയാണ് സസ്‌പെൻഡ് ചെയ്തത്.തളിപ്പറമ്പ് ഡിവൈഎസ്പി കെ.വി വേണുഗോപാലിന്റെ റിപ്പോർട്ടിന്റെ അടിസ്ഥാനത്തിൽ കണ്ണൂർ ജില്ലാ പോലീസ് മേധാവി ജി.ശിവവിക്രം ആണ് ഇവർക്കെതിരെ നടപടിയെടുത്തത്.ഗുരുതരമായ കൃത്യ വിലോപമാണ് സംഭവത്തിൽ പോലീസുകാരിൽ നിന്നും ഉണ്ടായിട്ടുള്ളതെന്ന് അന്വേഷണത്തിൽ കണ്ടെത്തിയിട്ടുണ്ട്.ലോറി അപകടത്തിൽപ്പെട്ടതും കത്തിയതും സ്റ്റേഷന്റെ ചാർജുള്ള എഎസ്ഐ ഉന്നത പോലീസ് ഉദ്യോഗസ്ഥരെ അറിയിക്കുകയോ പോലീസ് സ്റ്റേഷൻ ജനറൽ ഡയറിയിൽ രേഖപ്പെടുത്തുകയോ ചെയ്തിട്ടില്ല. കത്തി നശിച്ച ലോറി പോലീസ് സ്റ്റേഷനിലോ യാർഡിലോ എത്തിക്കുന്നതിന് പകരം ആക്രിക്കടക്കാരനെ ഏൽപ്പിച്ചത് പൊലീസിന് നാണക്കേടുണ്ടാക്കി.വിദഗ്ദ്ധർ വാഹനം പരിശോധിച്ചുള്ള അന്വേഷണമാണ് ഇനി നടക്കുകയെന്നും ഉന്നത പോലീസ് ഉദ്യോഗസ്ഥർ പറഞ്ഞു.

കോഴിക്കോട്:കരിപ്പൂർ വിമാനത്താവളത്തിൽ വൻ സ്വർണ്ണവേട്ട.അനധികൃതമായി കടത്താൻ ശ്രമിച്ച 6.5 കിലോഗ്രാം സ്വർണമാണ് ഡയറക്റ്ററേറ്റ് ഓഫ് റെവന്യൂ ഇന്റലിജൻസ് പിടികൂടിയത്. അന്താരാഷ്ട്ര വിപണിയിൽ രണ്ടു കോടി രൂപ വിലവരുന്നവയാണ് പിടിച്ചെടുത്ത സ്വർണ്ണം. രണ്ടുപേരിൽ നിന്നായാണ് സ്വർണ്ണം പിടികൂടിയത്. സംഭവത്തിൽ കോഴിക്കോട് മുക്കം സ്വദേശി ശിഹാബുദ്ധീൻ,മടവൂർ സ്വദേശി സജിൻ എന്നിവരെ ഡിആർഐ അറസ്റ്റ് ചെയ്തു.ശിഹാബുദ്ധീൻ ഷാർജയിൽ നിന്നും സജിൻ അബുദാബിയിൽ നിന്നുമാണ് വിമാനത്താവളത്തിലെത്തിയത്.

തിരുവനന്തപുരം:ആരോഗ്യവകുപ്പിലെയും മെഡിക്കൽ വിദ്യാഭ്യാസ വകുപ്പിലെയും ഡോക്റ്റർമാരുടെ പെൻഷൻ പ്രായം ഉയർത്താൻ മന്ത്രിസഭാ യോഗം തീരുമാനിച്ചു.ആരോഗ്യ വകുപ്പിലെ ഡോക്റ്റർമാരുടെ പ്രായം 56 ഇൽ നിന്നും 60 വയസ്സായി ഉയർത്തും.മെഡിക്കൽ വിദ്യാഭ്യാസ വകുപ്പിലെ ഡോക്റ്റർമാരുടെ പെൻഷൻ പ്രായം 60 ഇൽ നിന്നും 62 വയസ്സായി വർധിപ്പിക്കും.പരിചയ സമ്പന്നരായ ഡോക്റ്റർമാരുടെ ദൗർലഭ്യം ആരോഗ്യമേഖലയിലെ പ്രവർത്തനത്തെ പ്രതികൂലമായി ബാധിക്കുന്നത് ഒഴിവാക്കാനായാണ് പെൻഷൻ പ്രായം ഉയർത്താൻ തീരുമാനിച്ചത്.ഇത് കൂടാതെ ശ്രീനാരായണ ഗുരുവിന്റെ ജാതിയില്ല വിളംബരത്തിന്റെ നൂറാം വാർഷികം പ്രമാണിച്ച് സ്ഥാപിക്കുന്ന പ്രതിമ തിരുവന്തപുരത്തു സ്ഥാപിക്കാനും മന്ത്രിസഭാ യോഗം തീരുമാനിച്ചു.ശബരിമലയിൽ ഉത്സവ സീസണിൽ സ്പെഷ്യൽ ഡ്യൂട്ടിക്ക് നിയോഗിക്കപ്പെടുന്നവർക്ക് നൽകുന്ന ലഗേജ് അലവൻസ് 150 രൂപയിൽ നിന്നും 200 രൂപയാക്കാനും തീരുമാനിച്ചു. കേരളത്തിലെ അഞ്ചു ദേവസ്വം ബോർഡുകളിലേക്കും ദേവസ്വം റിക്രൂട്മെന്റ് മുഖേന നടത്തുന്ന നിയമനങ്ങളിൽ മുന്നോക്ക സമുദായങ്ങളിലെ സാമ്പത്തികമായി പിന്നോക്കം നിൽക്കുന്നവർക്ക് പത്തുശതമാനം സംവരണം നൽകാനും ഇന്ന് ചേർന്ന മന്ത്രിസഭാ യോഗം തീരുമാനിച്ചു.

കൊച്ചി:നടിയെ ആക്രമിച്ച കേസുമായി ബന്ധപ്പെട്ട് നടൻ ദിലീപിനെ പോലീസ് വീണ്ടും ചോദ്യം ചെയ്യുന്നു.ആലുവ പോലീസ് ക്ലബ്ബിലാണ് ചോദ്യം ചെയ്യൽ പുരോഗമിക്കുന്നത്.കേസുമായി ബന്ധപ്പെട്ട് 86 ദിവസം ജയിലിൽ കഴിഞ്ഞ ദിലീപിന് കർശന ഉപാധികളോടെയാണ് ജാമ്യം അനുവദിച്ചത്.സാക്ഷികളെ സ്വാധീനിക്കരുത്,തെളിവ് നശിപ്പിക്കരുത് തുടങ്ങിയ ജാമ്യ വ്യവസ്ഥകൾ ദിലീപ് ലംഘിച്ചതായാണ് സൂചന.കുറ്റപത്രം തയ്യാറാക്കുന്നതിന്റെ ഭാഗമായാണ് വീണ്ടും ചോദ്യം ചെയ്യുന്നതെന്നും സൂചനയുണ്ട്.