Hot Topic

പാലക്കാട്:പാലക്കാട്ട് ലീഗ് പ്രവർത്തകൻ കുത്തേറ്റു മരിച്ചു. കുന്തിപ്പുഴ സ്വദേശി സഫീർ(22) ആണു മരിച്ചത്. മണ്ണാർക്കാട്ടെ സഫീറിന്‍റെ ഉടമസ്ഥതയിലുള്ള വസ്ത്രവ്യാപാരശാലയിൽ കയറി  ഇന്നലെ രാത്രി ഒൻപതു മണിയോടെ ഒരു സംഘമാളുകൾ ഇയാളെ കുത്തിക്കൊലപ്പെടുത്തുകയായിരുന്നു. മുസ്ലിം ലീഗ് നഗരസഭാ കൗണ്‍സിലർ സിറാജിന്‍റെ മകനാണ് സഫീർ.കൊലപാതകത്തിനു പിന്നിൽ രാഷ്ട്രീയ ബന്ധമുണ്ടെന്നു പോലീസ് സംശയിക്കുന്നു. മരിച്ച  സഫീർ യൂത്ത്‌ ലീഗ്- എം.എസ്.എഫ്.പ്രവത്തകനാണ്.കുന്തിപ്പുഴ മൽസ്യ മാർക്കറ്റുമായി ബന്ധപെട്ടു സി.പി.ഐ-ലീഗ്‌ സംഘർഷം നിലനിന്നിരുന്നു.ഇതിന്റെ  തുടർച്ചയാണ് സംഭവമെന്ന് പറയുന്നു.സഫീറിന്റെ കൊലപാതകത്തിൽ പ്രതിഷേധിച്ച് മണ്ണാർക്കാട് നിയോജക മണ്ഡലത്തിൽ മുസ്ലിം ലീഗ് ഇന്ന് ഹർത്താലിന് ആഹ്വാനം ചെയ്തു.രാവിലെ ആറു മുതൽ വൈകിട്ട് ആറുവരെയാണ് ഹർത്താൽ.

അട്ടപ്പാടി:ആദിവാസി യുവാവ് മധുവിന്റെ മരണം ആൾക്കൂട്ട മർദനം മൂലമുണ്ടായ ആന്തരിക രക്തസ്രാവം മൂലമെന്ന് പോസ്റ്റ്‌മോർട്ടം റിപ്പോർട്ട്.ഇന്ന് രാവിലെ നടന്ന പോസ്റ്റ്‌മോർട്ടം നടപടികൾക്ക് ശേഷമാണ് മരണകാരണം മർദനം മൂലമാണെന്ന് വ്യക്തമായത്.മധുവിന്‍റെ തലയ്ക്ക് ഗുരുതരമായി പരിക്കേറ്റിരുന്നെന്നും വാരിയെല്ല് ചവിട്ടേറ്റ് ഒടിഞ്ഞതായും തൃശൂർ മെഡിക്കൽ കോളജ് ആശുപത്രിയിൽ നടത്തിയ പോസ്റ്റ്മോർട്ടം റിപ്പോർട്ടിൽ വ്യക്തമാക്കുന്നു. കൊലക്കുറ്റമാണെന്ന് തെളിഞ്ഞതോടെ പ്രതികൾക്കെതിരെ ഐപിസി 307,302,324 വകുപ്പുകൾ ചുമത്തി കൊലക്കുറ്റത്തിന് കേസെടുക്കുമെന്ന് തൃശൂർ റേഞ്ച് ഐജി എം.ആർ അജിത് കുമാർ പറഞ്ഞു.വ്യാഴാഴ്ചയാണ് കടുകുമണ്ണ ഊരിലെ മല്ലി-മല്ലൻ ദമ്പതികളുടെ മകൻ മധു (27)ദാരുണമായി കൊല്ലപ്പെട്ടത്. ഉച്ചയ്ക്ക് 12.30ന് മധുവിനെ ഒരുസംഘമാളുകൾ പിടികൂടുകയായിരുന്നു. ഭക്ഷ്യവസ്തുക്കൾ മോഷ്ടിച്ചുവെന്ന് ആരോപിച്ചായിരുന്നു മർദനം.സംഭവത്തിൽ 11 പേരെ പോലീസ് അറസ്റ്റ് ചെയ്തിരുന്നു.തൃശൂർ മെഡിക്കൽ കോളേജിൽ പോസ്റ്റ്‌മോർട്ടം നടപടികൾ പൂർത്തിയാക്കിയ ശേഷം മധുവിന്റെ മൃതദേഹം അട്ടപ്പാടിയിലേക്ക് കൊണ്ടുപോയി.

തൃശൂർ:അട്ടപ്പാടിയിൽ ഇന്നലെ മർദനമേറ്റ് മരിച്ച മധുവിന്റെ പോസ്റ്റ്‌മോർട്ടം തൃശൂർ മെഡിക്കൽ കോളേജിൽ നടക്കുന്നു.ഫോറൻസിക് വിഭാഗം മേധാവി ഡോ.ബാലറാമിന്റെ നേതൃത്വത്തിലാണ് പോസ്റ്റ്‌മോർട്ടം നടക്കുന്നത്.പതിനൊന്നു മണിയോടെ പോസ്റ്റ്‌മോർട്ടം പൂർത്തിയാകുമെന്നാണ് കരുതുന്നത്.പോലീസ് സാന്നിധ്യത്തിന് പുറമെ പോസ്റ്റ്‌മോർട്ടം ദൃശ്യങ്ങൾ പൂർണ്ണമായും ക്യാമറയിൽ പകർത്തുന്നുണ്ട്.മധുവിനേറ്റ മർദ്ദനത്തിന്റെ ആഴം എത്രത്തോളമുണ്ടെന്ന് പോസ്റ്റ്മോർട്ടത്തിലൂടെ മനസ്സിലാകും.മന്ത്രിമാരായ കെ.കെ ഷൈലജയും എ.കെ ബാലനും മെഡിക്കൽ കോളേജിൽ എത്തിയിട്ടുണ്ട്.കുറ്റക്കാർക്കെതിരെ പഴുതടച്ച അന്വേഷണമാണ് നടക്കുന്നതെന്നും മധുവിന്റെ കുടുംബത്തിന് ധനസഹായം ലഭ്യമാക്കുന്ന കാര്യം പരിഗണിക്കുമെന്നും മന്ത്രി പറഞ്ഞു.ആദിവാസികൾക്ക് മാത്രമാണ് കാട്ടിൽ കടക്കുന്നതിനുള്ള അവകാശം.അത് മറികടന്ന് കാട്ടിലെത്തി മധുവിനെ മർദിച്ചവർക്കെതിരെ വനാവകാശ നിയമമനുസരിച്ചും കേസെടുക്കുമെന്ന് മന്ത്രി പറഞ്ഞു. പ്രമുഖ രാഷ്ട്രീയ നേതാക്കളും ജനപ്രതിനിധികളും മെഡിക്കൽ കോളേജിൽ എത്തിച്ചേർന്നിട്ടുണ്ട്.മെഡിക്കൽ കോളേജിൽ സംഘർഷ സാധ്യത ഉണ്ടാകുമെന്ന റിപ്പോർട്ടിന്റെ അടിസ്ഥാനത്തിൽ പോലീസ് സംഘം നിലയുറപ്പിച്ചിട്ടുണ്ട്.

പാലക്കാട്:മോഷ്ട്ടാവാണെന്നാരോപിച്ച് അട്ടപ്പാടിയിൽ ആൾകൂട്ടം ആദിവാസി യുവാവിനെ മർദിച്ചു കൊന്നു.അട്ടപ്പാടി കടുകുമണ്ണ ഊരിലെ 27 വയസ്സുള്ള മധുവാണ് മരിച്ചത്.സംഭവവുമായി ബന്ധപ്പെട്ട് 15 പേർക്കെതിരെ വധശ്രമത്തിന് പോലീസ് കേസെടുത്തു.ഇന്നലെ വൈകുന്നേരം അട്ടപ്പാടി മുക്കാലിൽ വെച്ചാണ് മോഷണക്കുറ്റം ആരോപിച്ച് യുവാവിനെ നാട്ടുകാർ പിടികൂടിയത്. ഏറെക്കാലമായി ഈ പ്രദേശത്ത് നടന്നുവരുന്ന മോഷണങ്ങൾ മധുവാണ് നടത്തുന്നതെന്നാരോപിച്ചായിരുന്നു നാട്ടുകാർ ഇയാളെ പിടികൂടി മർദിച്ചത്.തുടർന്ന് പോലീസ് എത്തി മധുവിനെ അറസ്റ്റ് ചെയ്ത്  കൊണ്ടുപോകും വഴി പോലീസ് ജീപ്പിൽ വെച്ച് രക്തം ഛർദിച്ച മധു കുഴഞ്ഞു വീഴുകയായിരുന്നു. പോലീസ് ഇയാളെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

മധുവിനെ നാട്ടുകാർ പിടികൂടുന്നതിന്റെയും ബാഗുകൾ പരിശോധിക്കുന്നതിന്റെയും വീഡിയോ കഴിഞ്ഞ ദിവസം സോഷ്യൽ മീഡിയയിലൂടെ പുറത്തുവന്നിരുന്നു.ഇയാൾ ഉടുത്തിരുന്ന മുണ്ട് അഴിച്ച് അതുപയോഗിച്ച് കൈകൾ രണ്ടും കെട്ടിയ നിലയിൽ നിൽക്കുന്ന ഫോട്ടോയാണ് പ്രചരിച്ചത്.ഇതിൽ നാട്ടുകാർ ചിലർ സെൽഫി എടുക്കുന്നതിന്റെയും ചോദ്യം ചെയ്യുന്നതിന്റെയും ദൃശ്യങ്ങൾ  ഉണ്ടായിരുന്നു. സംഭവവുമായി ബന്ധപ്പെട്ട് മൂന്നുപേർ പോലീസ് കസ്റ്റഡിയിലെടുത്തതായി മന്ത്രി എ.കെ ബാലൻ പറഞ്ഞു.ഇവർക്കെതിരെ ശക്തമായ നടപടി ഉണ്ടാകുമെന്നും അദ്ദേഹം പറഞ്ഞു. അന്വേഷണത്തിന് ഡിജിപിക്ക് നിർദേശം നൽകിയിട്ടുണ്ടെന്നും മന്ത്രി വ്യക്തമാക്കി. വീഡിയോയിൽ കാണുന്ന ആൾക്കാരെ കേന്ദ്രീകരിച്ചാണ് പ്രധാനമായും അന്വേഷണം നടക്കുന്നത്.