Hot Topic

കണ്ണൂർ:കൂത്തുപറമ്പ് കോട്ടയംപൊയിലിൽ വാഹനാപകടത്തിൽ മാധ്യമ പ്രവർത്തകൻ ഉൾപ്പെടെ നാലുപേർക്ക് പരിക്ക്.കാർ യാത്രികരായ മനോരമ ന്യൂസിലെ അസോസിയേറ്റ് ന്യൂസ് പ്രൊഡ്യൂസറും കണ്ണൂർ മുഴക്കുന്ന് സ്വദേശിയുമായ വിവേക് മുഴക്കുന്ന് (40), ഭാര്യ ശ്വേത (35), മകൻ ആദിദേവ് (നാല്),ലോറി ക്ളീനറും കർണാടക സ്വദേശിയുമായ മണി എന്നിവർക്കാണ് പരിക്കേറ്റത്.ഇതിൽ ഗുരുതരമായി പരിക്കേറ്റ മണിയെ കോഴിക്കോട് മെഡിക്കൽ കോളേജിൽ പ്രവേശിപ്പിച്ചു. മറ്റുള്ളവരെ തലശ്ശേരി ഇന്ദിരാഗാന്ധി സഹകരണ ആശുപത്രിയിൽ പ്രവേശിപ്പിച്ചു.വിവേകും കുടുംബവും സഞ്ചരിച്ച കാർ വൈക്കോൽ ലോറിക്ക് പിന്നിൽ ഇടിക്കുകയായിരുന്നു.ഇന്ന് പുലർച്ചെ ആറുമണിയോടുകൂടി കോട്ടയംപൊയിലിനടുത്ത് ഏഴാംമൈലിലായിരുന്നു അപകടം നടന്നത്. ജോലിസ്ഥലമായ അരൂരിൽനിന്നും മുഴക്കുന്നിലേക്ക് വരികയായിരുന്നു വിവേകും കുടുംബവും. അപകടത്തിൽ കാറിന്‍റെ മുൻവശം പൂർണമായും തകർന്നു.

കണ്ണൂർ:കണ്ണൂര്‍: ‘കീഴാറ്റൂരിനെ സംഘര്‍ഷമേഖലയാക്കാനും അപകീര്‍ത്തിപ്പെടുത്താനും ശ്രമിക്കുന്നതിനെതിരേ’ സി.പി.എമ്മിന്റെ നേതൃത്വത്തിൽ ജനജാഗ്രത സമരം ഇന്ന്.ഇതിനായി കീഴാറ്റൂര്‍ ജനകീയസംരക്ഷണ സമിതിക്ക് ഇന്ന് രൂപം നൽകും. സംസ്ഥാന സെക്രട്ടേറിയറ്റംഗം എം.വി. ഗോവിന്ദന്‍ സമിതി രൂപവത്കരണപ്രഖ്യാപനം നടത്തും.തുടർന്ന് കീഴാറ്റൂർ ഗ്രാമവാസികൾ ഒന്നടങ്കം തളിപ്പറമ്പിലേക്കുള്ള ജനജാഗ്രത മാർച്ചിലും പങ്കെടുക്കും. വൈകുന്നേരം നാലുമണിക്ക് കീഴാറ്റൂർ ഇഎംഎസ് സ്മാരക വായനശാലയ്ക്ക് സമീപത്തുനിന്നും മാർച്ച് ആരംഭിക്കും.ദേശീയ പാതയ്ക്ക് സ്ഥലം കൈമാറാൻ സമ്മതമറിയിച്ചവരും ഗ്രാമവാസികളും ഒന്നിച്ച് കീഴാറ്റൂർ വയലിലേക്ക് മാർച്ച് ചെയ്യും.തുടർന്ന് ദേശീയപാതാ ബൈപ്പാസിനായി അടയാളപ്പെടുത്തിയ സി.പി.എം. പ്രവര്‍ത്തകരുടെയും അനുഭാവികളുടെയും സ്ഥലത്ത് ‘വികസനാവശ്യത്തിന് ഭൂമി വിട്ടുതരും’ എന്ന ബോര്‍ഡ് സ്ഥാപിക്കും. ആകെയുള്ള 60 ഭൂവുടമകളില്‍ 54 പേരും ശനിയാഴ്ച ഈ ബോര്‍ഡ് സ്ഥാപിക്കുമെന്ന് സി.പി.എം. നേതൃത്വം അറിയിച്ചു. ശേഷം മാർച്ച് തളിപ്പറമ്പിലേക്ക് നീങ്ങും.തളിപ്പറമ്പ് ടൌൺ സ്‌ക്വയറിൽ നടക്കുന്ന കൂട്ടായ്‌മയിൽ സിപിഐഎം സംസ്ഥാന കമ്മിറ്റിയംഗങ്ങളായ എം.വി ഗോവിന്ദൻ,ജില്ലാ സെക്രെട്ടറി പി.ജയരാജൻ,എംഎൽഎമാരായ ജെയിംസ് മാത്യു,ടി.വി രാജേഷ്,എൽഡിഎഫ് നേതാക്കൾ,കലാസാംസ്കാരിക പ്രവർത്തകർ എന്നിവർ പങ്കെടുക്കും.പ്രകടനം തളിപ്പറമ്പിലെത്തുമ്പോൾ ഐക്യദാര്‍ഢ്യവുമായെത്താന്‍ തളിപ്പറമ്പ് ഏരിയയിലെ പ്രവര്‍ത്തകര്‍ക്ക് നിര്‍ദേശം നല്‍കിയിട്ടുണ്ട്. ശനിയാഴ്ച സി.പി.എം. നേതൃത്വത്തില്‍ തളിപ്പറമ്പിലേക്കും ഞായറാഴ്ച ദേശീയപാതാ ബൈപ്പാസ് വിരുദ്ധ സമരത്തിന് ഐക്യദാര്‍ഢ്യവുമായി കീഴാറ്റൂരിലേക്കും നടക്കുന്ന പ്രകടനങ്ങളുടെ പശ്ചാത്തലത്തില്‍ പ്രദേശത്ത് വന്‍ സുരക്ഷയൊരുക്കും.ജില്ലാ പോലീസ് മേധാവി ശിവവിക്രമും ഡി.വൈ.എസ്.പി. കെ.വി.വേണുഗോപാലും സുരക്ഷയ്ക്ക് മേല്‍നോട്ടം വഹിക്കും.

തിരുവനന്തപുരം:പ്ലസ് ടു ഫിസിക്സ് പരീക്ഷയുടെ ചോദ്യപേപ്പർ വാട്സ് ആപ്പിലൂടെ ചോർന്നു. ഇരുത്തിയൊന്നാം തീയതി നടത്തിയ പരീക്ഷയുടെ ചോദ്യപേപ്പറാണ് ചോർന്നത്.വാട്സ് ആപ്പിലൂടെ ചോദ്യപേപ്പർ കിട്ടിയതായി തൃശൂർ ജില്ലാ ഹയർ സെക്കണ്ടറി കോ-ഓർഡിനേറ്ററാണ് അധികൃതരെ അറിയിച്ചത്.തുടർന്ന് അദ്ദേഹം അത് ജോയിന്റ് ഡയറക്റ്റർക്ക് തുടർനടപടികൾക്കായി അയച്ചുനൽകുകയും ചെയ്തിരുന്നു.എൺപതുശതമാനത്തിലധികം ചോദ്യവും പകർത്തിയെഴുതിയ പകർപ്പുകളാണ് വാട്സ് ആപ്പിലൂടെ പ്രചരിച്ചത്.വിവിധ സ്കൂളുകളിലെ കുട്ടികൾക്ക് ഇവ ലഭിക്കുകയും ചെയ്തിരുന്നു.ഹയർ സെക്കണ്ടറി മേധാവി നൽകിയ ചോദ്യപേപ്പർ ചോർന്നുവെന്ന പരാതിയിൽ സൈബർ അന്വേഷണം ആരംഭിച്ചിട്ടുണ്ട്. പരീക്ഷയ്ക്ക് മുൻപാണോ ശേഷമാണോ ചോദ്യപേപ്പർ ചോർന്നതെന്ന് സ്ഥിതീകരിച്ചിട്ടില്ല. അതിനാൽ തന്നെ പരീക്ഷ റദ്ദാക്കുന്നതിനെ കുറിച്ച് വിദ്യാഭ്യാസ വകുപ്പ് അന്തിമ തീരുമാനമൊന്നും എടുത്തിട്ടില്ല.

തിരുവനന്തപുരം:സംസ്ഥാനത്തെ അംഗീകാരമില്ലാത്ത സ്കൂളുകൾ അടച്ചുപൂട്ടുമെന്ന് വിദ്യാഭ്യാസമന്ത്രി സി.രവീന്ദ്രനാഥ് നിയമസഭയിൽ അറിയിച്ചു.ബാലാവകാശ കമ്മീഷന്റെ നിർദേശപ്രകാരം ഇത്തരം സ്കൂളുകൾ അടച്ചുപൂട്ടാൻ ബന്ധപ്പെട്ടവർക്ക് നിർദേശം നൽകിയതായും മന്ത്രി പറഞ്ഞു.1585 സ്കൂളുകൾക്കാണ് നോട്ടീസ് നൽകിയിരിക്കുന്നത്.വിദ്യാഭ്യാസ അവകാശ നിയമത്തിന്റെ അടിസ്ഥാനത്തിലാണ് സ്കൂളുകൾ പൂട്ടുന്നതെന്നും മന്ത്രി വ്യക്തമാക്കി. അംഗീകാരമില്ലാത്ത സ്കൂളുകൾ അടച്ചുപൂട്ടുന്നത് മൂലമുണ്ടാകുന്ന പ്രശ്നങ്ങൾ ചർച്ച ചെയ്യണം എന്നാവശ്യപ്പെട്ട് കെ.എൻ.എ ഖാദർ നൽകിയ അടിയന്തിര പ്രമേയത്തിന് മറുപടി നൽകുകയായിരുന്നു മന്ത്രി.സ്കൂളുകൾ അടച്ചുപൂട്ടുന്നതോടെ മൂന്നുലക്ഷത്തോളം വിദ്യാർത്ഥികളുടെ ഭാവി അപകടത്തിലാകുമെന്നും 25000 ത്തോളം വരുന്ന അദ്ധ്യാപകർ വഴിയാധാരമാകുമെന്നും കെ.എൻ.എ ഖാദർ ചൂണ്ടിക്കാട്ടി.ഇത്തരം സ്കൂളുകൾക്ക് അംഗീകാരം നേടിയെടുക്കാൻ രണ്ടു വർഷത്തെ സമയം അനുവദിക്കണമെന്ന് പ്രതിപക്ഷ നേതാവ് രമേശ് ചെന്നിത്തലയും ആവശ്യപ്പെട്ടിരുന്നു.