Hot Topic

കണ്ണൂർ:പിണറായിയിൽ ഒരു കുടുംബത്തിലെ നാല് പേർ ദുരൂഹ സാഹചര്യത്തിൽ മരിച്ച സംഭവത്തിൽ ഒൻപതു വയസ്സുകാരി ഐശ്വര്യയുടെ മൃതദേഹം പുറത്തെടുത്ത് പോസ്റ്റ്‌മോർട്ടം ചെയ്യുന്നു.സബ് ഡിവിഷണല്‍ മജിസ്‌ട്രേറ്റിന്‍റെ അനുമതിയോടെയാണ് ഐശ്വര്യയുടെ മൃതദേഹം പുറത്തെടുത്ത് പോസ്റ്റ്‌മോര്‍ട്ടം നടത്തുന്നത്.ഇക്കഴിഞ്ഞ ജനുവരി 21 നാണ് ഛർദിയും വയറിളക്കവും കാരണം കോഴിക്കോട് ബേബി മെമ്മോറിയല്‍ ആശുപത്രിയില്‍ പ്രവശിപ്പിച്ച ഐശ്വര്യ മരണമടഞ്ഞത്.ഐശ്വര്യയുടെ അമ്മ സൗമ്യയെയും കഴിഞ്ഞ ദിവസം ഇതേ ലക്ഷണങ്ങളെ തുടർന്ന് ആശുപത്രിയിൽ പ്രവേശിപ്പിച്ചുരുന്നു. സൗമ്യയുടെ പിതാവ് വണ്ണത്താന്‍ വീട്ടില്‍ കുഞ്ഞിക്കണ്ണന്‍ (76), ഭാര്യ കമല (65), മകള്‍ കീര്‍ത്തന (ഒന്നര വയസ്) എന്നിവരാണ് സമാനമായ രീതിയിൽ ദുരൂഹ സാഹചര്യത്തില്‍ മരിച്ച മറ്റുള്ളവര്‍.നാലു പേരും ആശുപത്രിയിൽ ചികിത്സയിലിരിക്കെയാണ് മരിച്ചത്.സംഭവത്തിൽ ഐശ്വര്യയുടെ ബന്ധുവായ വണ്ണത്താന്‍ വീട്ടില്‍ പ്രജീഷിന്‍റെ പരാതി പ്രകാരം പോലീസ് കേസെടുത്ത് അന്വേഷണം ആരംഭിച്ചിരുന്നു. നാല് പേരെയും നാല് ആശുപത്രികളിലാണ് ചികിത്സിച്ചത്. നാല് ആശുപത്രികളിലേയും ചികിത്സാ രേഖകള്‍ അന്വേഷണ സംഘം ശേഖരിച്ചിട്ടുണ്ട്. നാല് പേരും ആശുപത്രിയില്‍ എത്തി ചികിത്സ തുടങ്ങി പരിശോധനകള്‍ പൂര്‍ത്തിയാക്കി ആരോഗ്യ സ്ഥിതി വീണ്ടെടുത്ത ശേഷം പെട്ടെന്ന് മരണപ്പെടുകയാണുണ്ടായിട്ടുള്ളത്.

തിരുവനന്തപുരം:സംസ്ഥാനത്തിന്റെ തീര പ്രദേശങ്ങളിൽ കടൽക്ഷോഭം രൂക്ഷം. കടലാക്രമണത്തിൽ തൃശൂർ അഴീക്കോട് മുനക്കൽ ബീച്ചിൽ തിരയിൽപ്പെട്ട് യുവതിയെ കാണാതായി.മാള അഷ്ടമിച്ചിറ സ്വദേശിനി അശ്വിനിയെയാണ് കാണാതായത്.മാള മെറ്റ്‌സ് എൻജിനീയറിങ് വിദ്യാർത്ഥിനിയാണ്.അശ്വിനിയുടെ അമ്മ ഷീല,സഹോദരി ദൃശ്യ,ബന്ധു അതുല്യ എന്നിവർക്ക് പരിക്കേറ്റിരുന്നു.ഞായറാഴ്ച ഉച്ചയ്ക്ക് ഒന്നരയോടെയാണ് അശ്വിനിയുടെ കുടുംബം ബീച്ചിലെത്തിയത്. മുനക്കൽ ബീച്ച് ഫെസ്റ്റിന്റെ സമാപന ദിവസമായിരുന്നു ഇന്നലെ.തിരുവനന്തപുരത്തും കണ്ണൂരിലും പൊന്നാനിയിലും കടൽ പ്രക്ഷുബ്ധമാണ്.ഇന്നും കേരളതീത്ത് മൂന്നു മീറ്റർ ഉയരത്തിൽ തിരകളടിക്കാൻ സാധ്യതയുണ്ടെന്നും അതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണമെന്ന് സമുദ്ര നിരീക്ഷണ കേന്ദ്രം അറിയിച്ചു.

കോഴിക്കോട്:കോഴിക്കോട് തൊണ്ടയാട് ജംഗ്ഷനിൽ നിയന്ത്രണം വിട്ട ബസ് കാറിന് മുകളിലേക്ക് മറിഞ്ഞ് നിരവധി പേര്‍ക്ക് പരിക്കേറ്റു.പരിക്കേറ്റവരെ കോഴിക്കോട് മെഡിക്കല്‍ കോളേജില്‍ പ്രവേശിപ്പിച്ചു.ബസ് യാത്രക്കാര്‍ക്കാണ് കൂടുതലായും പരിക്കേറ്റത്.കോഴിക്കോട് നഗരത്തിലേക്ക് വന്ന സിറ്റി ബസ്സാണ് അപകടത്തിൽപ്പെട്ടത്. നിര്‍ത്തിയിട്ടിരുന്ന കാറിനും ബൈക്കിനും മുകളിലേക്കാണ് ബസ് മറിഞ്ഞത്.കാറിലും ബസ്സിലും ഈ സമയം യാത്രക്കാര്‍ ഉണ്ടായിരുന്നില്ല.നാട്ടുകാരും പോലീസും ചേർന്നാണ് രക്ഷാപ്രവർത്തനങ്ങൾ നടത്തിയത്.ആരുടെയും പരിക്ക് ഗുരുതരമല്ല.

തിരുവനന്തപുരം:ശമ്പള വർധനവിന്റെ കാര്യത്തിൽ സർക്കാർ വിജ്ഞാപനം ഇറക്കാൻ വൈകുന്നതിൽ പ്രതിഷേധിച്ച് സംസ്ഥാനത്തെ സ്വകാര്യ ആശുപത്രിയിലെ നഴ്സുമാർ ലോങ്ങ് മാർച്ച് നടത്താനൊരുങ്ങുന്നു.ചേർത്തല കെവിഎം ആശുപത്രി മുതൽ സെക്രെട്ടറിയേറ്റ് വരെ മാർച്ച് നടത്താനാണ് യുണൈറ്റഡ് നഴ്സസ് അസോസിയേഷന്റെ തീരുമാനം.’വാക് ഫോർ ജസ്റ്റിസ്’എന്നാണ് ലോങ്ങ് മാർച്ചിനെ യുഎൻഎ വിശേഷിപ്പിക്കുന്നത്.നഴ്സുമാരുടെ മിനിമം വേതനം 20,000 രൂപയാക്കിക്കൊണ്ടുള്ള പ്രഖ്യാപനം വന്ന് എട്ട് മാസം പിന്നിട്ടിട്ടും അതുമായി ബന്ധപ്പെട്ട ഉത്തരവ് പുറത്തിറങ്ങിയിട്ടില്ല. ഇതിനെതിരെയാണ് ലോങ്മാര്‍ച്ചും പണിമുടക്കും. 243 ദിവസമായി നഴ്സുമാര്‍ സമരം തുടരുന്ന ചേര്‍ത്തല കെ.വി എം ആശുപത്രിക്ക് മുന്നില്‍ നിന്നാരംഭിക്കുന്ന മാര്‍ച്ച്‌ സെക്രട്ടറിയേറ്റിനു മുന്നിലാണ് അവസാനിക്കുക. എട്ട് ദിവസം കൊണ്ട് 168 കിലോമീറ്റര്‍ ദൂരം പിന്നിടാനാണ് നഴ്സുമാര്‍ ലക്ഷ്യമിടുന്നത്.മിനിമം വേജ് ഉപദേശക സമിതി റിപ്പോര്‍ട്ട് സമര്‍പ്പിച്ചിട്ടും സര്‍ക്കാര്‍ അതിന്മേല്‍ തീരുമാനമെടുക്കാൻ വൈകുന്നതിൽ പ്രതിഷേധിച്ചാണ് ലോങ്ങ് മാർച്ച് നടത്താൻ നഴ്സുമാർ തീരുമാനിച്ചിരിക്കുന്നത്. തീരുമാനമെടുക്കാന്‍ 10 ദിവസം കൂടി വേണമെന്ന സര്‍ക്കാരിന്റെ നിലപാട് അംഗീകരിക്കാനാവില്ലെന്നും തീരുമാനമെടുക്കുന്നതില്‍ സര്‍ക്കാരിന് മുമ്ബാകെ തടസ്സങ്ങളില്ലെന്നും യുഎന്‍എ പ്രസിഡന്റ് ജാസ്മിന്‍ ഷാ പറഞ്ഞു.മാനേജ്‌മെന്റുകള്‍ക്കാകട്ടെ നഴ്‌സുമാര്‍ സമരം തുടരട്ടെയെന്ന നിലപാടാണെന്നും അദ്ദേഹം പറഞ്ഞു. അതേസമയം ശമ്ബള പരിഷ്‌കരണം വൈകുന്നതില്‍ പ്രതിഷേധിച്ച്‌ നഴ്‌സുമാര്‍ സെക്രട്ടറിയേറ്റിന് മുന്നില്‍ അനിശ്ചിതകാല നിരാഹാര സമരം നടത്തിവരികയാണ്. ഏപ്രില്‍ 24 മുതല്‍ അനിശ്ചിതകാല പണിമുടക്ക് നടത്താനും യുഎന്‍എ നേരത്തെ നിശ്ചയിച്ചിരുന്നു.അനിശ്ചിതകല പണിമുടക്ക് തുടങ്ങുന്ന 24 ന് തന്നെയാണ് കെവിഎമ്മില്‍ നിന്ന് ലോങ് മാര്‍ച്ചും തുടങ്ങുന്നത്. തങ്ങള്‍ പണിമുടക്കുമെന്ന മുന്നറിയിപ്പിനെ സര്‍ക്കാര്‍ ലാഘവബുദ്ധിയോടെയാണ് കാണുന്നതെന്ന പരാതിയും നഴ്‌സുമാര്‍ക്കുണ്ട്.നഴ്‌സുമാര്‍ അനിശ്ചിതകാല പണിമുടക്കിലേക്ക് നീങ്ങിയാല്‍ ആശുപത്രികളുടെ പ്രവര്‍ത്തനം സ്തംഭിക്കും.നിരവധി രോഗികളാണ് വെന്റിലേറ്ററിലും മറ്റും കഴിയുന്നത്. അടിയന്തര ശസ്ത്രക്രിയകളും മുടങ്ങും.ഇതിനൊപ്പം ആശുപത്രികളുടെ ദൈനംദിന പ്രവർത്തനങ്ങളും താളം തെറ്റും. യുഎന്‍എ പോലുള്ള ശക്തമായ സംഘടന സമരത്തിലേക്ക് നീങ്ങുമ്പോൾ ഉചിതമായ നടപടിയെടുക്കേണ്ട ബാധ്യത സർക്കാരിനാണ്.

തലശ്ശേരി:ഒന്നിന് പിന്നാലെ ഒന്നെന്ന നിലയിൽ ഒരു കുടുംബത്തിൽ നാലുമാസത്തിനിടെ മൂന്നു ദുരൂഹ മരണങ്ങൾ.ആറു വർഷം മുൻപും ഈ കുടുംബത്തിലുണ്ടായ ഒരു മരണമടക്കം നാലുപേരും മരിച്ചത് ഛർദിയെ തുടർന്ന്.ഇതിനിടെ വീട്ടിൽ അവശേഷിച്ചിരുന്ന  അഞ്ചാമത്തെയാളായ യുവതി കൂടി ഛർദിയെ തുടർന്ന് ചികിത്സ തേടിയിരിക്കുകയാണ്.ഈ സാഹചര്യത്തിലാണ് വിദഗ്ദ്ധ അന്വേഷണം ആരംഭിച്ചിരിക്കുന്നത്.കഴിഞ്ഞ ദിവസം ഛർദിയെ തുടർന്ന് തലശ്ശേരി സഹകരണ ആശുപത്രിയിൽ തീവ്ര പരിചരണ വിഭാഗത്തിൽ ചികിത്സ തേടിയെത്തിയ സൗമ്യയെ(28) വിദഗ്ദ്ധ സംഘം പരിശോധിച്ചു.ആറുവർഷം മുൻപായിരുന്നു സൗമ്യയുടെ ഇളയ മകൾ കീർത്തന ഛർദിയെ തുടർന്ന് മരിച്ചത്.അന്ന് കീർത്തനയ്ക്ക് ഒരുവയസ്സായിരുന്നു.മരണത്തിൽ സംശയം ഒന്നും തോന്നാത്തതിനെ തുടർന്ന് കീർത്തനയുടെ മൃതദേഹം പോസ്റ്റ്‌മോർട്ടം ചെയ്തിരുന്നില്ല.ഭർത്താവുമായി അകന്നു കഴിയുകയായിരുന്നു സൗമ്യ.പിന്നീട് ഈ വർഷം ജനുവരി 12 നു സൗമ്യയുടെ മൂത്ത മകൾ നാലാം ക്ലാസ് വിദ്യാർഥിനിയായിരുന്ന ഐശ്വര്യയും ഇതേ സാഹചര്യത്തിൽ മരണമടയുകയായിരുന്നു. മരണത്തിൽ ആർക്കും പരാതിയില്ലാത്തതിനാൽ മൃതദേഹം പോസ്റ്റ്‌മോർട്ടം ചെയ്തില്ല.ഇതിനു ശേഷം മാർച്ചിൽ സൗമ്യയുടെ അമ്മ കമലയും ഛർദിയെ തുടർന്ന് മരണപ്പെട്ടു.പിന്നീട് ഏപ്രിലിൽ സൗമ്യയുടെ അച്ഛൻ കരുണാകരനും ഛർദിയെ തുടർന്ന് മരിച്ചു.തുടർച്ചയായി മൂന്നു മരണങ്ങൾ സംഭവിച്ചതോടെ മരണത്തിൽ ബന്ധുക്കളും നാട്ടുകാരും സംശയം പ്രകടിപ്പിച്ചു.തുടർന്ന് പോലീസ് കേസെടുത്ത് മൃതദേഹം പോസ്റ്റ് മോർട്ടം നടത്തി.എന്നാൽ പോസ്റ്റ് മോർട്ടം റിപ്പോർട്ടിൽ ഒന്നും കണ്ടെത്താനായില്ല.ആന്തരികാവയവങ്ങളുടെ പരിശോധന ഫലം കൂടി ലഭിച്ചാൽ മാത്രമേ കൃത്യമായ നിഗമനങ്ങളിലേക്ക് എത്താൻ കഴിയുകയുള്ളൂ.ഇത് രണ്ടു ദിവസത്തിനുള്ളിൽ ലഭിക്കുമെന്നാണ് അന്വേഷണ സംഘത്തിന്റെ പ്രതീക്ഷ.ആശുപത്രിൽ പ്രവേശിപ്പിക്കപ്പെട്ട സൗമ്യ അപകട നില തരണം ചെയ്തിട്ടുണ്ട്.ഇവരുടെ രക്തം പരിശോധനയ്ക്കായി അയച്ചിട്ടുണ്ട്.പ്രദേശത്തെ കിണറുകളിലെ വെള്ളം പരിശോധിച്ചെങ്കിലും അസ്വാഭാവികമായി ഒന്നും കണ്ടെത്താൻ കഴിഞ്ഞിട്ടില്ല.നാല് മരണങ്ങളെയും കുറിച്ച് ഗൗരവത്തോടെ അന്വേഷിക്കുമെന്ന് തലശ്ശേരി സിഐ കെ.ഇ പ്രേമചന്ദ്രൻ അറിയിച്ചു.