തിരുവനന്തപുരം:ഓണത്തിന് വിലക്കയറ്റം തടയാൻ ലക്ഷ്യമിട്ട് 1400 ലധികം ഓണ ചന്തകള്‍ സപ്ലൈകോ നടത്തും. സപ്ലൈകോയ്ക്ക് ഔട്ട് ലെറ്റില്ലാത്ത 30 പഞ്ചായത്തുകളിലും ഓണ ചന്ത നടത്തുമെന്ന് ഭക്ഷ്യ-സിവില്‍ സപ്ലൈസ് മന്ത്രി പി തിലോത്തമന്‍ അറിയിച്ചു. ഇടനിലക്കാരെ ഒഴിവാക്കിയാണ് സിവില്‍ സപ്ലൈസ് കോര്‍പ്പറേഷന്‍ ഇത്തവണ ആന്ധ്രയില്‍ നിന്നും ഓണത്തിനായി അരിയെത്തിക്കുക.ജില്ലാ, താലൂക്ക് തലങ്ങളിലെ മെഗാ ഓണ ചന്തയ്ക്ക് പുറമേയാണ് സംസ്ഥാനത്ത് 1400 ലധികം കേന്ദ്രങ്ങളില്‍ സപ്ലൈകോ ഓണ ചന്തകള്‍ നടത്തുക. സപ്ലൈകോയ്ക്ക് ഔട്ട് ലെറ്റില്ലാത്ത 30 ഇടങ്ങളില്‍ തദ്ദേശ സ്വയം ഭരണ സ്ഥാപനങ്ങളുടെ സഹകരണത്തോടെയാകും ഓണ ചന്ത സംഘടിപ്പിക്കുക.ആന്ധ്രയില്‍ നിന്ന് അരിയും മുളകും എത്തിയ്ക്കുന്നതിനായി ഉടന്‍ തന്നെ ആന്ധ്ര സിവില്‍ സപ്ലൈസ് കോര്‍പ്പറേഷനുമായി കരാര്‍ ഒപ്പ് വെയ്ക്കും. ഓണത്തിന് മാത്രം 7000 ടണ്‍ അരിയെത്തിക്കാനാണ് ധാരണ. കേരളത്തിന്റെ ശബരി ഉത്പന്നങ്ങള്‍ വാങ്ങാമെന്ന് ആന്ധ്രയും സമ്മതിച്ചതായി മന്ത്രി അറിയിച്ചു.