കൊല്ലം:കൊല്ലത്ത് പത്താംക്‌ളാസ്സ് വിദ്യാർത്ഥിനി കെട്ടിടത്തിന് മുകളിൽ നിന്നും ചാടി ആത്മഹത്യക്ക് ശ്രമിച്ചു.ഇന്നലെ ഉച്ചയ്ക്ക് ഒന്നരമണിയോടെയാണ് സ്വകാര്യ സ്കൂൾ കെട്ടിടത്തിന്റെ മൂന്നാം നിലയിൽ നിന്നും ചാടി വിദ്യാർത്ഥിനി ആത്മഹത്യക്ക് ശ്രമിച്ചത്. സംഭവത്തിൽ രണ്ട് അദ്ധ്യാപകർക്കെതിരെ പോലീസ് കേസെടുത്തു.ആത്മഹത്യ ചെയ്യാൻ പ്രേരിപ്പിക്കുന്ന വിധത്തിൽ അദ്ധ്യാപകർ കുട്ടിയെ മാനസികമായി പീഡിപ്പിച്ചുവെന്നാണ്‌ പോലീസ് വ്യക്തമാക്കുന്നത്. മറ്റൊരു കുട്ടിയുമായുള്ള തർക്കത്തിൽ ഈ കുട്ടിയെ അദ്ധ്യാപകർ സ്റ്റാഫ് റൂമിലേക്ക് വിളിപ്പിച്ച് വഴക്കുപറഞ്ഞിരുന്നു.ഇതിനു ശേഷമാണ് കുട്ടി കെട്ടിടത്തിന് മുകളിൽ നിന്നും ചാടിയത്.വീഴ്ചയിൽ തലയ്ക്ക് ഗുരുതരമായി പരിക്കേറ്റതിനെ തുടർന്ന് തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിലാണ് വിദ്യാർഥിനി.സഹപാഠികളിൽ നിന്നും മറ്റ് അധ്യാപകരിൽ നിന്നും പോലീസ് വെള്ളിയാഴ്ച തന്നെ വിവരങ്ങൾ ശേഖരിച്ചിരുന്നു. ആശുപത്രിയിലെത്തി രക്ഷിതാക്കളിൽ നിന്ന് രാത്രിയിൽതന്നെ പോലീസ് മൊഴിയെടുക്കുകയും ചെയ്തു.