കണ്ണൂർ:പ്രധാനധ്യാപകന്റെ അനാസ്ഥമൂലം വിദ്യാർത്ഥിക്ക് സേ പരീക്ഷ അവസരം നഷ്ടമായ സംഭവത്തിൽ പ്രതിഷേധം.കണ്ണൂര്‍ സിറ്റി ഗവ. ഹയര്‍ സെക്കന്‍ഡറി സ്കൂള്‍ 10ാം ക്ലാസ് വിദ്യാര്‍ഥി എം. നിഹാദിനാണ് പരീക്ഷക്കുള്ള അവസരം നഷ്ടമായത്. ഇതോടെ വിദ്യാർത്ഥിക്ക് ഒരു അധ്യയന വര്‍ഷം നഷ്ടമാകുന്ന സ്ഥിതിയായി. സംഭവത്തില്‍ സ്കൂളിന് മുന്നില്‍ മുസ്ലിം യൂത്ത് ലീഗ് മേഖല കമ്മിറ്റിയുടെ നേതൃത്വത്തില്‍ പ്രതിഷേധ കൂട്ടായ്മ സംഘടിപ്പിച്ചു. വിദ്യാര്‍ഥിക്ക് സേ പരീക്ഷ എഴുതാന്‍ അവസരം ഒരുക്കുക, കൃത്യവിലോപം കാട്ടിയ പ്രധാനാധ്യാപകനെതിരെ നടപടി സ്വീകരിക്കുക തുടങ്ങിയ ആവശ്യങ്ങള്‍ ഉന്നയിച്ചായിരുന്നു പ്രതിഷേധം.സേ പരീക്ഷക്ക് ആവശ്യമായുള്ള ഫീസടക്കം നിഹാദ് ട്രഷറിയില്‍ അടച്ചിരുന്നു.ഇതിന്റെ രസീത് അടക്കം നേരത്തെ സ്കൂളില്‍ ഹാജരാക്കി. എന്നാല്‍, പരീക്ഷക്ക് ആവശ്യമായ തുടര്‍ നടപടികള്‍ പ്രധാനധ്യാപകന്‍ കൈക്കൊള്ളാത്തതിനാല്‍ നിഹാദിന് പരീക്ഷയെഴുതാന്‍ സാധിച്ചില്ല. സംഭവത്തില്‍ യൂത്ത് ലീഗ് നേതൃത്വം കഴിഞ്ഞ ദിവസം വിദ്യാഭ്യാസ മന്ത്രിക്ക് നേരിട്ട് പരാതി നല്‍കിയിരുന്നു. നേരത്തെ വിദ്യാര്‍ഥിയും രക്ഷിതാവും ജില്ല വിദ്യാഭ്യാസ ഉപ ഡയറക്ടര്‍ക്കും പരാതി നല്‍കിയിട്ടുണ്ട്. വിഷയം അന്വേഷിച്ച്‌ റിപ്പോര്‍ട്ട് നല്‍കാന്‍ പൊതുവിദ്യാഭ്യാസ ഡയറക്ടറെ മന്ത്രി ചുമതലപ്പെടുത്തിയിരിക്കുകയാണ്.